dil hi rah-e-talab mein na khona paDa mujhe

dil hī rah-e-talab meñ na khonā paḌā mujhe

haath apnī zindagī se bhī dhonā paḌā mujhe

ik din meñ hañs paḌā thā kisī ke ḳhayāl meñ

tā-umr itnī baat pe ronā paḌā mujhe

ik baar un ko paane kī dil meñ thī aarzū

sau baar apne aap ko khonā paḌā mujhe

barbād ho gayā huuñ magar mutma.in hai dil

sharminda-e-karam to na honā paḌā mujhe

dekhī ga.ī na mujh se jo tūfāñ kī bebasī

kashtī ko apnī aap Dubonā paḌā mujhe

jalve kahāñ kisī ke bisāt-e-nazar kahāñ

zarre meñ āftāb samonā paḌā mujhe

'aḳhtar' junūn-e-ishq ke māroñ ko dekh kar

ahl-e-ḳhirad hañse haiñ to ronā paḌā mujhe

dil hi rah-e-talab mein na khona paDa mujhe

hath apni zindagi se bhi dhona paDa mujhe

ek din mein hans paDa tha kisi ke KHayal mein

ta-umr itni baat pe rona paDa mujhe

ek bar un ko pane ki dil mein thi aarzu

sau bar apne aap ko khona paDa mujhe

barbaad ho gaya hun magar mutmain hai dil

sharminda-e-karam to na hona paDa mujhe

dekhi gai na mujh se jo tufan ki bebasi

kashti ko apni aap Dubona paDa mujhe

jalwe kahan kisi ke bisat-e-nazar kahan

zarre mein aaftab samona paDa mujhe

'aKHtar' junun-e-ishq ke maron ko dekh kar

ahl-e-KHirad hanse hain to rona paDa mujhe