dil ki gali mein ab tak hain pech-o-tab kya kya

dil kī galī meñ ab tak haiñ pech-o-tāb kyā kyā

utre haiñ is jahāñ meñ yuuñ to 'azāb kyā kyā

hai dastaras meñ sab kuchh hone se ik hañsī ke

dete haiñ log mujh ko jaane ḳhitāb kyā kyā

sīkhe haiñ har qadam par asbāq-e-zindagānī

pahuñche haiñ manziloñ tak ho kar ḳharāb kyā kyā

karte haiñ ratjage jab tā'bīr kā ta'āqub

lagte haiñ toḌne dam āñkhoñ meñ ḳhvāb kyā kyā

duniyā-e-muztarib meñ tanhā bhaTak rahe haiñ

tere savāl kyā kyā mere javāb kyā kyā

dil ki gali mein ab tak hain pech-o-tab kya kya

utre hain is jahan mein yun to 'azab kya kya

hai dastaras mein sab kuchh hone se ek hansi ke

dete hain log mujh ko jaane KHitab kya kya

sikhe hain har qadam par asbaq-e-zindagani

pahunche hain manzilon tak ho kar KHarab kya kya

karte hain ratjage jab ta'bir ka ta'aqub

lagte hain toDne dam aankhon mein KHwab kya kya

duniya-e-muztarib mein tanha bhaTak rahe hain

tere sawal kya kya mere jawab kya kya