dil to barsata hai har roz hi gham ke sawan

dil to barsātā hai har roz hī ġham ke sāvan

phir bhī bujhte nahīñ yādoñ ke sulagte īñdhan

zindagī ḳhvāboñ kī chilman meñ yuuñ iThlātī hai

jaise sakhiyoñ meñ ghirī ho koī sharmīlī dulhan

ab to har roz hī ik aañch na.ī uThtī hai

ye mirā jism na ban jaa.e dahaktā madfan

is se pahle ki sabā āñkh-micholī khele

band kar do dar-e-ummīd kā har har rauzan

shab ke ā.īne meñ tasvīr-e-tamannā dekho

aks dikhlā.egā kyā tum ko sahar kā darpan

is qadar bhī to satāo na bahakte ḳhvābo

dil ta.abīr kī ruk jaa.e laraztī dhaḌkan

hai vo vahshat ki havā bhī nahīñ chaltī 'at.har'

ban gayā kitnā bhayānak ye vafā kā āñgan

dil to barsata hai har roz hi gham ke sawan

phir bhi bujhte nahin yaadon ke sulagte indhan

zindagi KHwabon ki chilman mein yun iThlati hai

jaise sakhiyon mein ghiri ho koi sharmili dulhan

ab to har roz hi ek aanch nai uThti hai

ye mera jism na ban jae dahakta madfan

is se pahle ki saba aankh-micholi khele

band kar do dar-e-ummid ka har har rauzan

shab ke aaine mein taswir-e-tamanna dekho

aks dikhlaega kya tum ko sahar ka darpan

is qadar bhi to satao na bahakte KHwabo

dil tabir ki ruk jae larazti dhaDkan

hai wo wahshat ki hawa bhi nahin chalti 'athar'

ban gaya kitna bhayanak ye wafa ka aangan