dosti chand mulaqat se aage na baDhi

dostī chand mulāqāt se aage na baḌhī

shiddat-e-girya munājāt se aage na baḌhī

soz-e-dil dekhiye is bazm meñ parvāne kā

zindagī jis kī bas ik raat se aage na baḌhī

aa.e vo din meñ magar lutf vahī thā shab kā

zulf-e-shab-rang siyah raat se aage na baḌhī

ye baḌī raat magar vaah re apnī qismat

ye shab-e-qadr ibādāt se aage na baḌhī

din sitāroñ kī fanā raat fanā zarroñ kī

ye vo zid hai jo musāvāt se aage na baḌhī

chashm-e-giryāñ na kaho ye hai jhaḌī sāvan kī

koī mausam ho ye barsāt se aage na baḌhī

ek vo pī ke jise sair kareñ jannat kī

ek ye mai jo ḳharābāt se aage na baḌhī

kaise nādān ho qismat pe ho baiThe bekār

bas yahī aql ḳhayālāt se aage na baḌhī

pahle apnī to haqīqat zarā samjho 'dīvān'

ye vo miTTī hai jo auqāt se aage na baḌhī

dosti chand mulaqat se aage na baDhi

shiddat-e-girya munajat se aage na baDhi

soz-e-dil dekhiye is bazm mein parwane ka

zindagi jis ki bas ek raat se aage na baDhi

aae wo din mein magar lutf wahi tha shab ka

zulf-e-shab-rang siyah raat se aage na baDhi

ye baDi raat magar wah re apni qismat

ye shab-e-qadr ibaadat se aage na baDhi

din sitaron ki fana raat fana zarron ki

ye wo zid hai jo musawat se aage na baDhi

chashm-e-giryan na kaho ye hai jhaDi sawan ki

koi mausam ho ye barsat se aage na baDhi

ek wo pi ke jise sair karen jannat ki

ek ye mai jo KHarabaat se aage na baDhi

kaise nadan ho qismat pe ho baiThe bekar

bas yahi aql KHayalat se aage na baDhi

pahle apni to haqiqat zara samjho 'diwan'

ye wo miTTi hai jo auqat se aage na baDhi