dosto tumne bhi dekhi hai wo surat wo shabih

dosto tum ne bhī dekhī hai vo sūrat vo shabīh

jo nigāhoñ meñ samā jaatī hai manzar kī tarah

mujh ko ik qatra-e-be-faiz samajh ke na guzar

phail jā.ūñgā kisī roz samundar kī tarah

shahr-āshob meñ chīzoñ kā koī qaht nahīñ

zaḳhm milte haiñ dukānoñ meñ gul-e-tar kī tarah

apne hāthoñ kī lakīroñ meñ nahīñ hai shāyad

haa.e vo zulf jo khul jaa.e muqaddar kī tarah

mujh se itrāo na yaaro ki mujhe hai ma.alūm

aap kā ghar ki shikasta hai mire ghar kī tarah

dil ne kuchh ḳhvāb to dekhe the magar kyā kiije

vo bhī gum ho ga.e tālāb meñ patthar kī tarah

dosto tum ne bhi dekhi hai wo surat wo shabih

jo nigahon mein sama jati hai manzar ki tarah

mujh ko ek qatra-e-be-faiz samajh ke na guzar

phail jaunga kisi roz samundar ki tarah

shahr-ashob mein chizon ka koi qaht nahin

zaKHm milte hain dukanon mein gul-e-tar ki tarah

apne hathon ki lakiron mein nahin hai shayad

hae wo zulf jo khul jae muqaddar ki tarah

mujh se itrao na yaro ki mujhe hai malum

aap ka ghar ki shikasta hai mere ghar ki tarah

dil ne kuchh KHwab to dekhe the magar kya kije

wo bhi gum ho gae talab mein patthar ki tarah