duniya saji hui hai jo bazar ki tarah

duniyā sajī huī hai jo bāzār kī tarah

maiñ bhī chalūñgā aaj ḳharīdār kī tarah

TuuTe hoñ yā purāne hoñ apne to haiñ yahī

ḳhvāboñ ko jam.a kartā huuñ āsār kī tarah

ye aur baat hai ki numāyāñ rahūñ magar

duniyā mujhe chhupā.e hai āzār kī tarah

merī kitāb-e-zīst tum ik baar to paḌho

phir chāhe pheñk do kisī aḳhbār kī tarah

ab zindagī kī dhuup bhī sīdhā karegī kyā

ab tak maiñ kaj rahā tirī dastār kī tarah

muddat huī ki ghūmtā phirtā huuñ rāt-din

afkār ke dayār meñ nādār kī tarah

is ḳhauf se ki saaya bhī apnā na chhūT jaa.e

ruk ruk ke chal rahā huuñ maiñ bīmār kī tarah

duniya saji hui hai jo bazar ki tarah

main bhi chalunga aaj KHaridar ki tarah

TuTe hon ya purane hon apne to hain yahi

KHwabon ko jama karta hun aasar ki tarah

ye aur baat hai ki numayan rahun magar

duniya mujhe chhupae hai aazar ki tarah

meri kitab-e-zist tum ek bar to paDho

phir chahe phenk do kisi aKHbar ki tarah

ab zindagi ki dhup bhi sidha karegi kya

ab tak main kaj raha teri dastar ki tarah

muddat hui ki ghumta phirta hun raat-din

afkar ke dayar mein nadar ki tarah

is KHauf se ki saya bhi apna na chhuT jae

ruk ruk ke chal raha hun main bimar ki tarah