ehsas-e-mohabbat ka jadu paiham yun chalta rahta hai

ehsās-e-mohabbat kā jaadū paiham yuuñ chaltā rahtā hai

har sham.a ke jal kar bujhne tak parvāna bhī jaltā rahtā hai

insāf kar ai saaqī tū hī piine meñ na kyoñ ho bad-mazgī

jab roz tire maiḳhāne kā dastūr badaltā rahtā hai

ma.alūm nahīñ jaanā hai kahāñ din raat yuuñ hī manzil manzil

rasta hai ki kaTtā jaatā hai raahī hai ki chaltā rahtā hai

le jaam uThā aur ḳhair manā in piine vāloñ kī saaqī

mai-ḳhvāroñ ke hangāme hī se mai-ḳhāna sañbhaltā rahtā hai

ik vo haiñ yahāñ tak aane meñ sau hiile bahāne karte haiñ

ik dil hai jo mere pahlū meñ har vaqt machaltā rahtā hai

sharmā.ī nigāhoñ kā aalam pūchhe to koī mere dil se

palkeñ haiñ ki jhuktī jaatī haiñ jaadū hai ki chaltā rahtā hai

hai is kā bharosa lā-hāsil ai soz javānī kā sūraj

chaḌhtā hai to chaḌhtā jaatā hai Dhaltā hai to Dhaltā rahtā hai

ehsas-e-mohabbat ka jadu paiham yun chalta rahta hai

har shama ke jal kar bujhne tak parwana bhi jalta rahta hai

insaf kar ai saqi tu hi pine mein na kyon ho bad-mazgi

jab roz tere maiKHane ka dastur badalta rahta hai

malum nahin jaana hai kahan din raat yun hi manzil manzil

rasta hai ki kaTta jata hai rahi hai ki chalta rahta hai

le jam uTha aur KHair mana in pine walon ki saqi

mai-KHwaron ke hangame hi se mai-KHana sanbhalta rahta hai

ek wo hain yahan tak aane mein sau hile bahane karte hain

ek dil hai jo mere pahlu mein har waqt machalta rahta hai

sharmai nigahon ka aalam puchhe to koi mere dil se

palken hain ki jhukti jati hain jadu hai ki chalta rahta hai

hai is ka bharosa la-hasil ai soz jawani ka suraj

chaDhta hai to chaDhta jata hai Dhalta hai to Dhalta rahta hai