fareb-e-dair-o-haram mein aa kar tawaf-e-jam-o-subu na karna

fareb-e-dair-o-haram meñ aa kar tavāf-e-jām-o-subū na karnā

gunāh hai rind-mashrabī meñ gunāh kī aarzū na karnā

bayāñ se kyā ḳhaak shiddat-e-soz-e-ġham kā andāza ho sakegā

guzārish-e-hāl-e-vāqa.ī hai marīz kā guftugū na karnā

agar tujhe gulsitān-e-hastī meñ hai par-o-bāl kī zarūrat

to shāḳh-e-gul par kabhī murattab nasheman-e-rang-o-bū na karnā

tulūa hotā hai āftāb-e-ḳhudī garebān-e-be-ḳhudī se

tajassus-e-aql gumrahī hai tū bhuul kar justujū na karnā

ho husn kī raa.e meñ shikast-e-ḳhudī ki tauhīn-e-be-niyāzī

aqīda-e-ishq meñ to lekin harām hai aarzū na karnā

yahīñ se ik roz āftāb-e-hayāt-e-nau phir tulūa hogā

agar vo tār-e-nazar bhī baḳhsheñ to chāk-e-dil tū rafū na karnā

tirī nigāh-e-karam ne har anjuman ke aa.iiñ badal diye haiñ

kabhī ḳhamoshī savāb thī ab azaab hai guftugū na karnā

namāz kyā laġhzish-e-qadam bhī hai mustajāb us kī bārgah meñ

agar mayassar huzūr-e-dil ho gunāh bhī be-vuzū na karnā

havā-e-sair-e-chaman mubārak guzārish-e-'faiz' is qadar hai

asīr-e-dām-e-nigāh ho kar tū dil ko be-ābrū na karnā

fareb-e-dair-o-haram mein aa kar tawaf-e-jam-o-subu na karna

gunah hai rind-mashrabi mein gunah ki aarzu na karna

bayan se kya KHak shiddat-e-soz-e-gham ka andaza ho sakega

guzarish-e-haal-e-waqai hai mariz ka guftugu na karna

agar tujhe gulsitan-e-hasti mein hai par-o-baal ki zarurat

to shaKH-e-gul par kabhi murattab nasheman-e-rang-o-bu na karna

tulua hota hai aaftab-e-KHudi gareban-e-be-KHudi se

tajassus-e-aql gumrahi hai tu bhul kar justuju na karna

ho husn ki rae mein shikast-e-KHudi ki tauhin-e-be-niyazi

aqida-e-ishq mein to lekin haram hai aarzu na karna

yahin se ek roz aaftab-e-hayat-e-nau phir tulua hoga

agar wo tar-e-nazar bhi baKHshen to chaak-e-dil tu rafu na karna

teri nigah-e-karam ne har anjuman ke aain badal diye hain

kabhi KHamoshi sawab thi ab azab hai guftugu na karna

namaz kya laghzish-e-qadam bhi hai mustajab us ki bargah mein

agar mayassar huzur-e-dil ho gunah bhi be-wuzu na karna

hawa-e-sair-e-chaman mubarak guzarish-e-'faiz' is qadar hai

asir-e-dam-e-nigah ho kar tu dil ko be-abru na karna