fareb-e-nikhat-o-gulzar se bachao mujhe

fareb-e-nik.hat-o-gulzār se bachāo mujhe

karam karo kisī sahrā meñ chhoḌ aao mujhe

vo jins huuñ maiñ jise bik ke muddateñ guzrīñ

jo ho sake to kahīñ se ḳharīd laao mujhe

machal rahī hai nazar chhū ke dekhiye us ko

simaT rahā hai badan haath mat lagāo mujhe

kisī tarah in añdheroñ kī umr to kam ho

jalāne vaalo zarā der tak jalāo mujhe

kisī pe apne sivā ab nazar nahīñ paḌtī

mirī nigāh se ai dosto bachāo mujhe

ye kis kī laash liye jaate ho uThā.e hue

kahīñ vo maiñ to nahīñ huuñ zarā dikhāo mujhe

bikhar chukā huuñ 'alī' maiñ ġhazal ke sheroñ meñ

bisāt-e-āriz-o-lab se sameT laao mujhe

fareb-e-nikhat-o-gulzar se bachao mujhe

karam karo kisi sahra mein chhoD aao mujhe

wo jins hun main jise bik ke muddaten guzrin

jo ho sake to kahin se KHarid lao mujhe

machal rahi hai nazar chhu ke dekhiye us ko

simaT raha hai badan hath mat lagao mujhe

kisi tarah in andheron ki umr to kam ho

jalane walo zara der tak jalao mujhe

kisi pe apne siwa ab nazar nahin paDti

meri nigah se ai dosto bachao mujhe

ye kis ki lash liye jate ho uThae hue

kahin wo main to nahin hun zara dikhao mujhe

bikhar chuka hun 'ali' main ghazal ke sheron mein

bisat-e-ariz-o-lab se sameT lao mujhe