fishaar-e-husn se aaghosh-e-tang mahke hai

fishār-e-husn se āġhosh-e-tañg mahke hai

sabā ke lams se phūloñ kā rañg mahke hai

adā-e-nīm-nigāhī bhī kyā qayāmat hai

ki ban ke phuul vo zaḳhm-e-ḳhadañg mahke hai

ye vahshateñ bhī mirī ḳhushbuoñ kā hissa haiñ

ki mere ḳhuun se dāmān-e-sañg mahke hai

adā-e-nāz bhī hai husn-o-ihtizāz kī baat

ki tār-e-zulf nahīñ añg añg mahke hai

lahū ke phūloñ se ārāsta hai teġh-e-sitam

shafaq shafaq jo ye maqtal kā rañg mahke hai

charāġh-e-lāla se raushan huā hai dasht-e-vafā

havā-e-dil se ye naqsh-e-farañg mahke hai

shakar-laboñ ke tabassum kī baat kyā 'tanvīr'

nafas nafas meñ mai-e-lāla-rañg mahke hai

fishaar-e-husn se aaghosh-e-tang mahke hai

saba ke lams se phulon ka rang mahke hai

ada-e-nim-nigahi bhi kya qayamat hai

ki ban ke phul wo zaKHm-e-KHadang mahke hai

ye wahshaten bhi meri KHushbuon ka hissa hain

ki mere KHun se daman-e-sang mahke hai

ada-e-naz bhi hai husn-o-ihtizaz ki baat

ki tar-e-zulf nahin ang ang mahke hai

lahu ke phulon se aarasta hai tegh-e-sitam

shafaq shafaq jo ye maqtal ka rang mahke hai

charagh-e-lala se raushan hua hai dasht-e-wafa

hawa-e-dil se ye naqsh-e-farang mahke hai

shakar-labon ke tabassum ki baat kya 'tanwir'

nafas nafas mein mai-e-lala-rang mahke hai