fishaar-e-karb-e-hasti ka tamasha kya nahin dekha

fishār-e-karb-e-hastī kā tamāshā kyā nahīñ dekhā

kahīñ ḳhud jism apnā aur kahīñ saayā nahīñ dekhā

sabab kyā hai achānak yuuñ tumhāre chīḳh uThne kā

mujhe lagtā hai tum ne ḳhvāb kuchh achchhā nahīñ dekhā

badalte mausamoñ kī bhāgte lamhoñ kī āñkhoñ ne

salāmat koī is tūfān meñ beḌā nahīñ dekhā

bahut dekhe yahāñ iz.hār ke bahte hue dariyā

kuaañ lekin taḳhayyul kā koī gahrā nahīñ dekhā

koī mausam ho koī rut magar in sar-zamīnoñ meñ

kisī paude ko maiñ ne phūltā-phaltā nahīñ dekhā

mire ik she'r kā us ko dikhā do āñkh-bhar chehra

agar āñkhoñ ne us kī būñd-bhar dariyā nahīñ dekhā

fazā-e-zindagānī thī kuchh itnī ḳhvāb-ālūda

bachā sāñsoñ kā apnī kitnā sarmāyā nahīñ dekhā

bikhartī TūTtī is kā.enāt-e-zīst meñ 'vasfī'

shikasta maiñ ne terī soch kā bajrā nahīñ dekhā

fishaar-e-karb-e-hasti ka tamasha kya nahin dekha

kahin KHud jism apna aur kahin saya nahin dekha

sabab kya hai achanak yun tumhaare chiKH uThne ka

mujhe lagta hai tum ne KHwab kuchh achchha nahin dekha

badalte mausamon ki bhagte lamhon ki aankhon ne

salamat koi is tufan mein beDa nahin dekha

bahut dekhe yahan izhaar ke bahte hue dariya

kuan lekin taKHayyul ka koi gahra nahin dekha

koi mausam ho koi rut magar in sar-zaminon mein

kisi paude ko main ne phulta-phalta nahin dekha

mere ek she'r ka us ko dikha do aankh-bhar chehra

agar aankhon ne us ki bund-bhar dariya nahin dekha

faza-e-zindagani thi kuchh itni KHwab-aluda

bacha sanson ka apni kitna sarmaya nahin dekha

bikharti TuTti is kaenat-e-zist mein 'wasfi'

shikasta main ne teri soch ka bajra nahin dekha