ghazal ke sab masail hum wali dakni se puchhenge

ġhazal ke sab masā.il ham valī daknī se pūchheñge

haiñ is meñ kitne pech-o-ḳham valī daknī se pūchheñge

ġhazal kī ibtidā kis se hai kab se hai kahāñ se hai

ye bāteñ ham to kam se kam valī daknī se pūchheñge

ġhazal ko jām-o-mīnā zulf se āzād karne meñ

lagā.eñ aur kitnā dam valī daknī se pūchheñge

diloñ ke zaḳhm par ḳhālis ġhazal marham sī kaam aa.e

kahāñ miltā hai ye marham valī daknī se pūchheñge

ġhazal kyoñ ḳhush nahīñ hotī ḳhushī chāhe kisī kī ho

use darkār kyoñ hai ġham valī daknī se pūchheñge

ġhazal kī kāmyābī meñ hai kirdār-e-zamānā kyā

zamāna kyoñ huā barham valī daknī se pūchheñge

jo kahte haiñ ki shā.ir maġhfirat kā haq nahīñ rakhte

unhīñ ke sāmne ham-dam valī daknī se pūchheñge

adab bhī baT gayā maz.hab ke maslak kī tarah 'rāshid'

yahāñ bhī kitne haiñ parcham valī daknī se pūchheñge

ghazal ke sab masail hum wali dakni se puchhenge

hain is mein kitne pech-o-KHam wali dakni se puchhenge

ghazal ki ibtida kis se hai kab se hai kahan se hai

ye baaten hum to kam se kam wali dakni se puchhenge

ghazal ko jam-o-mina zulf se aazad karne mein

lagaen aur kitna dam wali dakni se puchhenge

dilon ke zaKHm par KHalis ghazal marham si kaam aae

kahan milta hai ye marham wali dakni se puchhenge

ghazal kyon KHush nahin hoti KHushi chahe kisi ki ho

use darkar kyon hai gham wali dakni se puchhenge

ghazal ki kaamyabi mein hai kirdar-e-zamana kya

zamana kyon hua barham wali dakni se puchhenge

jo kahte hain ki shair maghfirat ka haq nahin rakhte

unhin ke samne ham-dam wali dakni se puchhenge

adab bhi baT gaya mazhab ke maslak ki tarah 'rashid'

yahan bhi kitne hain parcham wali dakni se puchhenge