ghire hain chaaron taraf bekasi ke baadal phir

ghire haiñ chāroñ taraf bekasī ke bādal phir

sulag rahā hai sitāroñ bharā ik āñchal phir

bas ek baar un āñkhoñ ko us ne chūmā thā

hamesha nam hī rahā āñsuoñ se kājal phir

ye kaisī aag hai jo por por raushan hai

ye kis ne rakh dī mirī uñgliyoñ pe mash.al phir

phir ab kī baar lahū-rañg bārisheñ barseñ

kisī ne kaaT diye haiñ saroñ ke jañgal phir

ragoñ meñ taptī huī ḳhushbueñ machalne lagīñ

malā badan pe na.e mausamoñ ne sandal phir

kahīñ to ret se chashma nikal hī aa.egā

bhaTak rahā hai vo kāñdhoñ pe le ke chhāgal phir

phir us akelī bharī dopahar ne jhulsā hai

ki yaad aane lagā sub.h se vo pāgal phir

ghire hain chaaron taraf bekasi ke baadal phir

sulag raha hai sitaron bhara ek aanchal phir

bas ek bar un aankhon ko us ne chuma tha

hamesha nam hi raha aansuon se kajal phir

ye kaisi aag hai jo por por raushan hai

ye kis ne rakh di meri ungliyon pe mashal phir

phir ab ki bar lahu-rang barishen barsen

kisi ne kaT diye hain saron ke jangal phir

ragon mein tapti hui KHushbuen machalne lagin

mala badan pe nae mausamon ne sandal phir

kahin to ret se chashma nikal hi aaega

bhaTak raha hai wo kandhon pe le ke chhagal phir

phir us akeli bhari dopahar ne jhulsa hai

ki yaad aane laga subh se wo pagal phir