gulon ke husn-e-zeba par phaban mahsus hoti hai

guloñ ke husn-e-zebā par phaban mahsūs hotī hai

tirī parchhā.īñ jab sehn-e-chaman mahsūs hotī hai

zamāna ne hamāre biich itnī dūriyāñ rakh diiñ

tumheñ gar sochtā bhī huuñ thakan mahsūs hotī hai

tire baḳhshe hue zaḳhmoñ ko lamhe bhar ga.e lekin

abhī tak dil ke pahlū meñ dukhan mahsūs hotī hai

bichhaḌte vaqt muḌ muḌ dekhnā bojhal qadam rakhnā

usī manzar kī āñkhoñ meñ chubhan mahsūs hotī hai

kisī tūfāñ kī dastak chor darvāze pe hai shāyad

jabīñ par vaqt kī paḌtī shikan mahsūs hotī hai

laḌakpan meñ khulī āñkhoñ se jo tum ne dikhā.e the

unhīñ ḳhvāboñ kī palkoñ meñ jalan mahsūs hotī hai

mire pahlū se to uTh kar ga.e the muddateñ guzrīñ

tumhāre lams kī ab bhī tapan mahsūs hotī hai

mahak terī uḌā kar le ga.e jhoñke taġhāful ke

bahāroñ meñ bhī sāñsoñ meñ ghuTan mahsūs hotī hai

nahīñ ma.alūm 'rāhat' kitne andeshoñ kā hai qaidī

vo jis ko ghar meñ rah kar bhī thakan mahsūs hotī hai

gulon ke husn-e-zeba par phaban mahsus hoti hai

teri parchhain jab sehn-e-chaman mahsus hoti hai

zamana ne hamare bich itni duriyan rakh din

tumhein gar sochta bhi hun thakan mahsus hoti hai

tere baKHshe hue zaKHmon ko lamhe bhar gae lekin

abhi tak dil ke pahlu mein dukhan mahsus hoti hai

bichhaDte waqt muD muD dekhna bojhal qadam rakhna

usi manzar ki aankhon mein chubhan mahsus hoti hai

kisi tufan ki dastak chor darwaze pe hai shayad

jabin par waqt ki paDti shikan mahsus hoti hai

laDakpan mein khuli aankhon se jo tum ne dikhae the

unhin KHwabon ki palkon mein jalan mahsus hoti hai

mere pahlu se to uTh kar gae the muddaten guzrin

tumhaare lams ki ab bhi tapan mahsus hoti hai

mahak teri uDa kar le gae jhonke taghaful ke

bahaaron mein bhi sanson mein ghuTan mahsus hoti hai

nahin malum 'rahat' kitne andeshon ka hai qaidi

wo jis ko ghar mein rah kar bhi thakan mahsus hoti hai