gum ho ke apni zat mein kya bolne lage

gum ho ke apnī zaat meñ kyā bolne lage

aisā na ho shikast-e-anā bolne lage

jo karb-o-iztirāb ke ma.anī samajh ga.e

vo log ab ba-rang-e-vafā bolne lage

ehsās-e-kamtarī ne baḌhā dī matā-e-fikr

jab pāsbān-e-aql sivā bolne lage

ġhairoñ ko kyā kahūñ unheñ ilzām kaise duuñ

ḳhud ham ko apne log burā bolne lage

ai fikr aql-o-hosh junūñ se gurez kar

aisī ḳhatā na kar ki ḳhatā bolne lage

Thahregī kaise husn ke chehre pe dilkashī

jab ang ang sharm-o-hayā bolne lage

jab bhī huā nafāz-e-sharī.at kā tazkira

bastī meñ har taraf se ḳhudā bolne lage

patte gire jo peḌoñ se kal raat TuuT kar

mahsūs yuuñ huā tire pā bolne lage

'hairat' vo kyā ġhazal hai ki hoñ ahl-e-fan ḳhamosh

ho baat jab ġhazal kā sila bolne lage

gum ho ke apni zat mein kya bolne lage

aisa na ho shikast-e-ana bolne lage

jo karb-o-iztirab ke mani samajh gae

wo log ab ba-rang-e-wafa bolne lage

ehsas-e-kamtari ne baDha di mata-e-fikr

jab pasban-e-aql siwa bolne lage

ghairon ko kya kahun unhen ilzam kaise dun

KHud hum ko apne log bura bolne lage

ai fikr aql-o-hosh junun se gurez kar

aisi KHata na kar ki KHata bolne lage

Thahregi kaise husn ke chehre pe dilkashi

jab ang ang sharm-o-haya bolne lage

jab bhi hua nafaz-e-shariat ka tazkira

basti mein har taraf se KHuda bolne lage

patte gire jo peDon se kal raat TuT kar

mahsus yun hua tere pa bolne lage

'hairat' wo kya ghazal hai ki hon ahl-e-fan KHamosh

ho baat jab ghazal ka sila bolne lage