hae nairang-e-junun par mera qurban hona

haa.e nairang-e-junūñ par mirā qurbāñ honā

fasl-e-gul dekh ke ghar kā mire vīrāñ honā

chal ga.ī sharm-o-sharārat meñ dam-e-nazzāra

aa.ina dekh ke us shoḳh kā hairāñ honā

ahl-e-dil kā vahī īmāñ hai jise kufr kaheñ

aql-e-kāfir ko huā jabr musalmāñ honā

ġham ke ehsās ko bhūle se samajh baiThe majāz

merī hastī kī haqīqat kā hai uryāñ honā

ham to sajda use kahte haiñ ki sar phir na uThe

aur uTThe bhī to ḳhāk-e-rah-e-jānāñ honā

dāvar-e-hashr ke aage bhī vafā ne rokā

us se dekhā na gayā merā pashemāñ honā

hāl-e-dil pūchhte hī rang taġhayyur kyoñ hai

baat jab kuchh nahīñ phir kis liye hairāñ honā

merī hastī kī haqīqat nahīñ pūchho 'dīvān'

fitna-e-hashr mujassam huā insāñ honā

hae nairang-e-junun par mera qurban hona

fasl-e-gul dekh ke ghar ka mere viran hona

chal gai sharm-o-shararat mein dam-e-nazzara

aaina dekh ke us shoKH ka hairan hona

ahl-e-dil ka wahi iman hai jise kufr kahen

aql-e-kafir ko hua jabr musalman hona

gham ke ehsas ko bhule se samajh baiThe majaz

meri hasti ki haqiqat ka hai uryan hona

hum to sajda use kahte hain ki sar phir na uThe

aur uTThe bhi to KHak-e-rah-e-jaanan hona

dawar-e-hashr ke aage bhi wafa ne roka

us se dekha na gaya mera pasheman hona

haal-e-dil puchhte hi rang taghayyur kyon hai

baat jab kuchh nahin phir kis liye hairan hona

meri hasti ki haqiqat nahin puchho 'diwan'

fitna-e-hashr mujassam hua insan hona