hai ajab shaghl mera raat ke Dhal jaane tak

hai ajab shaġhl mirā raat ke Dhal jaane tak

dekhtā rahtā huuñ taarā koī jal jaane tak

phir sulā degā use bahr kā ik gahrā sukūt

mastī hai mauj meñ sāhil pe machal jaane tak

kyā huā us kī girah meñ hai agar ik duurī

maiñ bhī to us kā huuñ bas us ke badal jaane tak

phir vahī maiñ mirā phir hogā vahī kār-e-jahāñ

baat saarī hai kisī ġham ke bahal jaane tak

vo zarūrat se ziyāda hī farāġhat thī ki maiñ

jis meñ phirtā rahā hasrat ke nikal jaane tak

merā ik uzr vo suntā rahā ḳhāmoshī se

aur maiñ baiThā rahā barf pighal jaane tak

rok rakhnī hai kahīñ ek jagah dard kī raat

kisī bīmār kī hālat ke sambhal jaane tak

rizq miTTī kā mirā ḳhuuñ nahīñ banñe vaalā

sub.h ke chehre pe ġhāza koī mal jaane tak

ain mumkin hai Thahar jaa.e kahīñ aaj kā din

aur ye Thahrā hī rahe yuuñ tire kal jaane tak

ek ātish hai ki dahkā.e hue rakhtī hai

kisī zanjīr ke halqoñ ke pighal jaane tak

maiñ bhī 'shāhīñ' use milne nahīñ jaane vaalā

us ke andar se kisī bal ke nikal jaane tak

hai ajab shaghl mera raat ke Dhal jaane tak

dekhta rahta hun tara koi jal jaane tak

phir sula dega use bahr ka ek gahra sukut

masti hai mauj mein sahil pe machal jaane tak

kya hua us ki girah mein hai agar ek duri

main bhi to us ka hun bas us ke badal jaane tak

phir wahi main mera phir hoga wahi kar-e-jahan

baat sari hai kisi gham ke bahal jaane tak

wo zarurat se ziyaada hi faraghat thi ki main

jis mein phirta raha hasrat ke nikal jaane tak

mera ek uzr wo sunta raha KHamoshi se

aur main baiTha raha barf pighal jaane tak

rok rakhni hai kahin ek jagah dard ki raat

kisi bimar ki haalat ke sambhal jaane tak

rizq miTTi ka mera KHun nahin banne wala

subh ke chehre pe ghaza koi mal jaane tak

ain mumkin hai Thahar jae kahin aaj ka din

aur ye Thahra hi rahe yun tere kal jaane tak

ek aatish hai ki dahkae hue rakhti hai

kisi zanjir ke halqon ke pighal jaane tak

main bhi 'shahin' use milne nahin jaane wala

us ke andar se kisi bal ke nikal jaane tak