hai wahi ek mere siwa aur main

hai vahī ek mere sivā aur maiñ

donoñ tanhā haiñ merā ḳhudā aur maiñ

hai ḳhulāsa mirī zindagī kā yahī

ek nākām harf-e-duā aur maiñ

tīrgī ḳhatm karne kī ummīd par

raat bhar hī jalā ik diyā aur maiñ

kaun jītegā is jañg meñ dekhiye

ho ga.e haiñ muqābil havā aur maiñ

aa.ī barkhā kī rut mere dukh bāñTne

ro.e phir saath mil kar ghaTā aur maiñ

ik taraf vo hai aur us ke saare sitam

ik taraf sabr kī intihā aur maiñ

kyuuñ sazā phir milegī kisī aur ko

haiñ gunahgār merī anā aur maiñ

tishnagī kī alāmāt ke taur par

do hī naam ā.eñge karbalā aur maiñ

hai wahi ek mere siwa aur main

donon tanha hain mera KHuda aur main

hai KHulasa meri zindagi ka yahi

ek nakaam harf-e-dua aur main

tirgi KHatm karne ki ummid par

raat bhar hi jala ek diya aur main

kaun jitega is jang mein dekhiye

ho gae hain muqabil hawa aur main

aai barkha ki rut mere dukh banTne

roe phir sath mil kar ghaTa aur main

ek taraf wo hai aur us ke sare sitam

ek taraf sabr ki intiha aur main

kyun saza phir milegi kisi aur ko

hain gunahgar meri ana aur main

tishnagi ki alamat ke taur par

do hi nam aaenge karbala aur main