hum apni jaan se ai but bahut bezar baiThe hain

ham apnī jaan se ai but bahut bezār baiThe haiñ

bharī barsāt meñ aakar pas-e-dīvār baiThe haiñ

kareñ kyā arz-e-matlab ḳhauf se yaañ jaan jaatī hai

liye vo haath meñ kuchh is tarah talvār baiThe haiñ

palaT kar bastiyoñ se yuuñ kahā daaya ne shīrīñ se

sunā kuchh aur ai biTiyā vo tesha maar baiThe haiñ

hue haiñ kār-zār-e-ishq meñ ham be-tarah zaḳhmī

ki shakl-e-teġh dil par abrū-e-ḳhamdār baiThe haiñ

hamārī ḳhush-nasībī se huā kuchh daal meñ kaalā

raqīb-e-rū-siyah ko aaj vo phaTkār baiThe haiñ

sitamgar dekh lenā phaT paḌeñge ġhair ke sar par

nahīñ be-vajah ham yuuñ sūrat-e-dīvār baiThe haiñ

kahā ye āḳhirī hafte ne hañs kar ahl-kāroñ se

zarā dekho mire pīchhe miyāñ itvār baiThe haiñ

sar-e-mahfil jo us but se kabhī arz-e-tamannā kī

kahā chupke se chup rahiye abhī aġhyār baiThe haiñ

uThā kar chauk meñ sar shaiḳh jī ne hañs ke farmāyā

bahut se dushman-e-īmāñ sar-e-bāzār baiThe haiñ

hum apni jaan se ai but bahut bezar baiThe hain

bhari barsat mein aakar pas-e-diwar baiThe hain

karen kya arz-e-matlab KHauf se yan jaan jati hai

liye wo hath mein kuchh is tarah talwar baiThe hain

palaT kar bastiyon se yun kaha daya ne shirin se

suna kuchh aur ai biTiya wo tesha mar baiThe hain

hue hain kar-zar-e-ishq mein hum be-tarah zaKHmi

ki shakl-e-tegh dil par abru-e-KHamdar baiThe hain

hamari KHush-nasibi se hua kuchh dal mein kala

raqib-e-ru-siyah ko aaj wo phaTkar baiThe hain

sitamgar dekh lena phaT paDenge ghair ke sar par

nahin be-wajah hum yun surat-e-diwar baiThe hain

kaha ye aaKHiri hafte ne hans kar ahl-karon se

zara dekho mere pichhe miyan itwar baiThe hain

sar-e-mahfil jo us but se kabhi arz-e-tamanna ki

kaha chupke se chup rahiye abhi aghyar baiThe hain

uTha kar chauk mein sar shaiKH ji ne hans ke farmaya

bahut se dushman-e-iman sar-e-bazar baiThe hain