hamara qaul-o-amal aaj moatabar bhi nahin

hamārā qaul-o-amal aaj mo'atabar bhī nahīñ

hamārī baat kā logoñ pe kuchh asar bhī nahīñ

qadam baḌhā to diye haiñ talāsh-e-manzil meñ

koī nishāñ bhī nahīñ koī rāhbar bhī nahīñ

abhī to fikr thī dastār hī ke jaane kī

pata chalā hai ki shānoñ pe apne sar bhī nahīñ

lagā.e kis liye tum ne ye sang ke ambār

hamāre shahr meñ to koī shīshagar bhī nahīñ

ye hukmrānī-o-satvat hamārā virsa haiñ

agarche shaam bhī apnī nahīñ sahar bhī nahīñ

butoñ ke naam pe apnā vajūd gum kar deñ

ham apnī zaat se ab itne be-ḳhabar bhī nahīñ

ye aur baat hai duniyā sharīf jāntī hai

hamāre paas sharāfat to nām-bhar bhī nahīñ

fazā meñ ghol diyā kis ne zahr-e-ḳhāmoshī

koī fuġhāñ bhī nahīñ koī shor-o-shar bhī nahīñ

sukūn-e-qalb mayassar bhī ho to kyūñkar ho

koī ḳhabar bhī nahīñ koī nāma-bar bhī nahīñ

uḌaan bharne kī ḳhvāhish to hai 'nadīm' bahut

vo hausla bhī nahīñ hai vo bāl-o-par bhī nahīñ

hamara qaul-o-amal aaj mo'atabar bhi nahin

hamari baat ka logon pe kuchh asar bhi nahin

qadam baDha to diye hain talash-e-manzil mein

koi nishan bhi nahin koi rahbar bhi nahin

abhi to fikr thi dastar hi ke jaane ki

pata chala hai ki shanon pe apne sar bhi nahin

lagae kis liye tum ne ye sang ke ambar

hamare shahr mein to koi shishagar bhi nahin

ye hukmrani-o-satwat hamara wirsa hain

agarche sham bhi apni nahin sahar bhi nahin

buton ke nam pe apna wajud gum kar den

hum apni zat se ab itne be-KHabar bhi nahin

ye aur baat hai duniya sharif jaanti hai

hamare pas sharafat to nam-bhar bhi nahin

faza mein ghol diya kis ne zahr-e-KHamoshi

koi fughan bhi nahin koi shor-o-shar bhi nahin

sukun-e-qalb mayassar bhi ho to kyunkar ho

koi KHabar bhi nahin koi nama-bar bhi nahin

uDan bharne ki KHwahish to hai 'nadim' bahut

wo hausla bhi nahin hai wo baal-o-par bhi nahin