hamare dasht ke zarron mein gum hai pahnai

hamāre dasht ke zarroñ meñ gum hai pahnā.ī

inhī meñ dhūñDiye maidān-e-ābla-pā.ī

vakīl-e-kufr thā kal goyā qasr-e-kābul meñ

vahīñ se sūrat-e-annasr kī sadā aa.ī

junūn-e-dajl meñ shahzāda shahr-sāz hai ab

vo bad-nasīb ki thā asl meñ to sahrā.ī

hadaf haiñ ḳhiljī-o-aurangzeb aur āzād

ki un kā jurm thā apne vatan kī yakjā.ī

hazār nukte kiye zehn ne na.e paidā

kisī ke kaam na aa.ī magar ye dānā.ī

maiñ is jahān meñ koī misāl ban na sakā

ma.āshre ne atā kī hai mujh ko tanhā.ī

idhar to asia bhī koh-e-barf hai 'tāriq'

safed sāhatoñ meñ soch bhī hai sarmā.ī

hamare dasht ke zarron mein gum hai pahnai

inhi mein dhunDiye maidan-e-abla-pai

wakil-e-kufr tha kal goya qasr-e-kabul mein

wahin se surat-e-annasr ki sada aai

junun-e-dajl mein shahzada shahr-saz hai ab

wo bad-nasib ki tha asl mein to sahrai

hadaf hain KHilji-o-aurangzeb aur aazad

ki un ka jurm tha apne watan ki yakjai

hazar nukte kiye zehn ne nae paida

kisi ke kaam na aai magar ye danai

main is jahan mein koi misal ban na saka

maashre ne ata ki hai mujh ko tanhai

idhar to asia bhi koh-e-barf hai 'tariq'

safed sahaton mein soch bhi hai sarmai