hamare honTon pe ek muddat se jis ka nauha machal raha hai

hamāre hoñToñ pe ek muddat se jis kā nauha machal rahā hai

ye utrā utrā udaas chehra kabhī hamārī ġhazal rahā hai

ajab nazāra-parast dilbar hai tum sunoge to hañs paḌoge

lahū rulātā hai aur kahtā hai surḳh chashma ubal rahā hai

jo apnī lailā se duur bhī hai jise rivāyat kā paas bhī hai

koī to hai jo nisāb-e-hijrāñ ke saare ma.anī badal rahā hai

na aarzū hai na ishq baaqī ujaaḌ dil meñ udaas dil meñ

jab is pe kuchh bhī nahīñ bachā hai to kaahe saalā uchhal rahā hai

nazar haqīqat-shanās jis din milegī us roz jaan loge

hamārī āñkhoñ ke ratjagoñ meñ ye ḳhvāb na.iiñ hai jo pal rahā hai

vo ek lamha jise taqaddus kī zad meñ aa kar maiñ kho chukā huuñ

vo ek lamha mirī havas ko hazār rātoñ se khal rahā hai

hamare honTon pe ek muddat se jis ka nauha machal raha hai

ye utra utra udas chehra kabhi hamari ghazal raha hai

ajab nazara-parast dilbar hai tum sunoge to hans paDoge

lahu rulata hai aur kahta hai surKH chashma ubal raha hai

jo apni laila se dur bhi hai jise riwayat ka pas bhi hai

koi to hai jo nisab-e-hijran ke sare mani badal raha hai

na aarzu hai na ishq baqi ujaD dil mein udas dil mein

jab is pe kuchh bhi nahin bacha hai to kahe sala uchhal raha hai

nazar haqiqat-shanas jis din milegi us roz jaan loge

hamari aankhon ke ratjagon mein ye KHwab nain hai jo pal raha hai

wo ek lamha jise taqaddus ki zad mein aa kar main kho chuka hun

wo ek lamha meri hawas ko hazar raaton se khal raha hai