har ek dil mein Khaar-e-alam dekhte hain

har ik dil meñ ḳhār-e-alam dekhte haiñ

ḳhushī jis ko kahte haiñ kam dekhte haiñ

jo dil hī meñ husn-e-sanam dekhte haiñ

kahīñ jānib-e-jām-e-jam dekhte haiñ

kise kis qadar pā.edārī hai hāsil

tirā qaul apnī qasam dekhte haiñ

yaqīn-o-amal saath rahte haiñ jin ke

vo manzil ko zer-e-qadam dekhte haiñ

bhar aatā hai dil ḳhuun rotī haiñ āñkheñ

kisī ko jo ham chashm-nam dekhte haiñ

jahāñ dard-mandoñ se ḳhālī nahīñ hai

ye har ashk meñ mauj-e-yam dekhte haiñ

ye husn-o-mohabbat kā rishta ajab hai

ham in ko hamesha baham dekhte haiñ

ye maanā sakat dekhne kī nahīñ hai

tujhe phir bhī terī qasam dekhte haiñ

tirī parda-dārī hai malhūz-e-ḳhātir

tujhe dil kī āñkhoñ se ham dekhte haiñ

rubāb-e-nafas par hamesha nazar hai

ham is saaz kā zer-o-bam dekhte haiñ

salīqa adab kā sikhātī hai piirī

jo jhukte na the un ko ḳham dekhte haiñ

jo ā.īna aatā hai un ke muqābil

vo ā.īna hairat se ham dekhte haiñ

idhar jazb-e-ulfat udhar kam nigāhī

ajab ālam-e-shauq-o-ram dekhte haiñ

vahīñ Dālte haiñ haram kī binā ham

jahāñ terā naqsh-e-qadam dekhte haiñ

kisī ke koī be-sabab kaam aa.e

ye dastūr duniyā meñ kam dekhte haiñ

ye hastī bhī ik ruḳh usī kā hai 'tālib'

ye kyuuñ aap sū-e-adam dekhte haiñ

har ek dil mein KHar-e-alam dekhte hain

KHushi jis ko kahte hain kam dekhte hain

jo dil hi mein husn-e-sanam dekhte hain

kahin jaanib-e-jam-e-jam dekhte hain

kise kis qadar paedari hai hasil

tera qaul apni qasam dekhte hain

yaqin-o-amal sath rahte hain jin ke

wo manzil ko zer-e-qadam dekhte hain

bhar aata hai dil KHun roti hain aankhen

kisi ko jo hum chashm-nam dekhte hain

jahan dard-mandon se KHali nahin hai

ye har ashk mein mauj-e-yam dekhte hain

ye husn-o-mohabbat ka rishta ajab hai

hum in ko hamesha baham dekhte hain

ye mana sakat dekhne ki nahin hai

tujhe phir bhi teri qasam dekhte hain

teri parda-dari hai malhuz-e-KHatir

tujhe dil ki aankhon se hum dekhte hain

rubab-e-nafas par hamesha nazar hai

hum is saz ka zer-o-bam dekhte hain

saliqa adab ka sikhati hai piri

jo jhukte na the un ko KHam dekhte hain

jo aaina aata hai un ke muqabil

wo aaina hairat se hum dekhte hain

idhar jazb-e-ulfat udhar kam nigahi

ajab aalam-e-shauq-o-ram dekhte hain

wahin Dalte hain haram ki bina hum

jahan tera naqsh-e-qadam dekhte hain

kisi ke koi be-sabab kaam aae

ye dastur duniya mein kam dekhte hain

ye hasti bhi ek ruKH usi ka hai 'talib'

ye kyun aap su-e-adam dekhte hain