hasin hai to rahe subh teri par nahin kar

hasīn hai to rahe sub.h terī par nahīñ kar

maiñ shab-parast huuñ mujh par abhī sahar nahīñ kar

jo raah maiñ ne chunī hai kahīñ nahīñ jaatī

umīd-e-nāz mujhe apnā ham-safar nahīñ kar

tamāsh-bīñ mire hone ke munharif ho jaa.eñ

ab is qadar bhī kahānī ko muḳhtasar nahīñ kar

tū chāñdnī ke tarannum se khilne vaalā badan

maiñ be-charāġh Thikānā huuñ mujh ko ghar nahīñ kar

abhī gumān ka.ī marhaloñ se guzregā

ai badduā-e-tazabzub-dilāñ asar nahīñ kar

ye baḌhte saa.e shikārī haiñ mere sūraj ke

ḳhudāyā shaam ab itnī bhī mo'atabar nahīñ kar

darīche haiñ koī āñkheñ ḳhudā.ī duniyā kī

inhīñ se ho ke guzar aur koī dar nahīñ kar

hasin hai to rahe subh teri par nahin kar

main shab-parast hun mujh par abhi sahar nahin kar

jo rah main ne chuni hai kahin nahin jati

umid-e-naz mujhe apna ham-safar nahin kar

tamash-bin mere hone ke munharif ho jaen

ab is qadar bhi kahani ko muKHtasar nahin kar

tu chandni ke tarannum se khilne wala badan

main be-charagh Thikana hun mujh ko ghar nahin kar

abhi guman kai marhalon se guzrega

ai baddua-e-tazabzub-dilan asar nahin kar

ye baDhte sae shikari hain mere suraj ke

KHudaya sham ab itni bhi mo'atabar nahin kar

dariche hain koi aankhen KHudai duniya ki

inhin se ho ke guzar aur koi dar nahin kar