hawa-e-ishq mein shamil hawas ki lu hi rahi

havā-e-ishq meñ shāmil havas kī lū hī rahī

baḌhā bhī rabt to be-rabt guftugū hī rahī

na aa.ī haath meñ titlī-gudāz ḳhushbū kī

gul-e-badan kī mahak mere chār-sū hī rahī

vo dasht dasht sī āñkheñ chaman chaman chehra

sarāb-e-ḳhauf kī ik lahr rū-ba-rū hī rahī

tulūa ufuq pe hai ab tak vahī sitāra-e-bād

maiñ bhuul jā.ūñ use dil meñ aarzū hī rahī

hazār baar luTā husn-e-barg-o-bār magar

rag-e-shajar meñ ravāñ mauj-e-rañg-o-bū hī rahī

harī rutoñ kī huī āsmān se bārish

magar zamīn-e-tamannā lahū hī rahī

safar kī dhuup ne tan-man jalā diyā merā

madār-e-dasht meñ saa.e kī justujū hī rahī

huā na duur mire dil se zañg-e-mahrūmī

tamām raat ravāñ chashm-e-āb-jū hī rahī

abad abad se mirī ḳhud se jañg jaarī hai

ye ḳhair-o-shar kī balā mujh se dū-badū hī rahī

ubaltā rahtā hai siine meñ karb kā laavā

libās-e-ḳhāk ko bhī hājat-e-rafū hī rahī

tavāf-e-shahr-e-nigārāñ mirā hī jurm nahīñ

zan-e-havā bhī to āvāra kū-ba-kū hī rahī

hawa-e-ishq mein shamil hawas ki lu hi rahi

baDha bhi rabt to be-rabt guftugu hi rahi

na aai hath mein titli-gudaz KHushbu ki

gul-e-badan ki mahak mere chaar-su hi rahi

wo dasht dasht si aankhen chaman chaman chehra

sarab-e-KHauf ki ek lahr ru-ba-ru hi rahi

tulua ufuq pe hai ab tak wahi sitara-e-baad

main bhul jaun use dil mein aarzu hi rahi

hazar bar luTa husn-e-barg-o-bar magar

rag-e-shajar mein rawan mauj-e-rang-o-bu hi rahi

hari ruton ki hui aasman se barish

magar zamin-e-tamanna lahu hi rahi

safar ki dhup ne tan-man jala diya mera

madar-e-dasht mein sae ki justuju hi rahi

hua na dur mere dil se zang-e-mahrumi

tamam raat rawan chashm-e-ab-ju hi rahi

abad abad se meri KHud se jang jari hai

ye KHair-o-shar ki bala mujh se du-badu hi rahi

ubalta rahta hai sine mein karb ka lawa

libas-e-KHak ko bhi hajat-e-rafu hi rahi

tawaf-e-shahr-e-nigaran mera hi jurm nahin

zan-e-hawa bhi to aawara ku-ba-ku hi rahi