hawa-e-sham chale to bikharne lagti hun

havā-e-shām chale to bikharne lagtī huuñ

maiñ dasht-e-dil se simaT kar guzarne lagtī huuñ

azal se tā-ba-abad ek lamha merā hai

tirī nigāh meñ jis dam Thaharne lagtī huuñ

nazar ke lams se rañg-e-badan chhupātī rahī

maiñ titliyoñ kī tarah kyoñ ki marne lagtī huuñ

milī firāq ke ā.īne meñ panāh mujhe

visāl-e-harf meñ Dhal kar sañvarne lagtī huuñ

varaq pe saada tamanna ke ḳhāl-o-ḳhad haiñ magar

maiñ soch kar tujhe kuchh rañg bharne lagtī huuñ

jab āgahī ke ḳhadd-o-ḳhāl dekhtī huuñ kabhī

to apne husn-e-tahayyur se Darne lagtī huuñ

agar tū va.ada nibhātā nahīñ to us lamhe

maiñ apne aap se bhī ḳhud mukarne lagtī huuñ

hawa-e-sham chale to bikharne lagti hun

main dasht-e-dil se simaT kar guzarne lagti hun

azal se ta-ba-abad ek lamha mera hai

teri nigah mein jis dam Thaharne lagti hun

nazar ke lams se rang-e-badan chhupati rahi

main titliyon ki tarah kyon ki marne lagti hun

mili firaq ke aaine mein panah mujhe

visal-e-harf mein Dhal kar sanwarne lagti hun

waraq pe sada tamanna ke KHal-o-KHad hain magar

main soch kar tujhe kuchh rang bharne lagti hun

jab aagahi ke KHadd-o-KHal dekhti hun kabhi

to apne husn-e-tahayyur se Darne lagti hun

agar tu wada nibhata nahin to us lamhe

main apne aap se bhi KHud mukarne lagti hun