hoti hai hasinon se jo jafa ushshaq gawara karte hain

hotī hai hasīnoñ se jo jafā 'ushshāq gavārā karte haiñ

ye shauq se qurbāñ hote haiñ vo naaz se maarā karte haiñ

hāthoñ meñ nahīñ shamshīr magar ye qatl-e-‘ālam kaisā hai

jaatī haiñ hazāroñ kī jāneñ vo ḳhud ko sañvārā karte haiñ

sīkhā hai gulistāñ meñ ham ne kāñToñ se sabaq ḳhuddārī kā

phūloñ kī tarah shabnam ke liye dāman na pasārā karte haiñ

dārā.ī mubārak ho tum ko ham mast haiñ apnī gudḌī meñ

qatre pe qanā'at karte haiñ dariyā se kinārā karte haiñ

jab un se ye pūchhā jaatā hai vahshat hai kise is mahfil meñ

vo ek adā se merī taraf āñkhoñ se ishārā karte haiñ

is meñ bhī ḳhudā kī hikmat hai duniyā meñ nahīñ jo ham-rangī

kuchh log ba-sehhat jiite haiñ kuchh dukh meñ guzārā karte haiñ

daulat thī lagāv rakhte the hai tark-e-ta'alluq ġhurbat meñ

jab dil meñ biThāte the vo hameñ ab dil se utārā karte haiñ

ik daur vo thā sab mil-jul kar dukh-dard baTāyā karte the

ik daur ye hai ham aapas meñ parḳhāsh gavārā karte haiñ

din-rāt taḌaptā rahtā huuñ hai merī ḳhabar un ko 'bartar'

karne ko vo parda karte haiñ chhup-chhup ke nazārā karte haiñ

hoti hai hasinon se jo jafa 'ushshaq gawara karte hain

ye shauq se qurban hote hain wo naz se mara karte hain

hathon mein nahin shamshir magar ye qatl-e-‘alam kaisa hai

jati hain hazaron ki jaanen wo KHud ko sanwara karte hain

sikha hai gulistan mein hum ne kanTon se sabaq KHuddari ka

phulon ki tarah shabnam ke liye daman na pasara karte hain

darai mubarak ho tum ko hum mast hain apni gudDi mein

qatre pe qana'at karte hain dariya se kinara karte hain

jab un se ye puchha jata hai wahshat hai kise is mahfil mein

wo ek ada se meri taraf aankhon se ishaara karte hain

is mein bhi KHuda ki hikmat hai duniya mein nahin jo ham-rangi

kuchh log ba-sehhat jite hain kuchh dukh mein guzara karte hain

daulat thi lagaw rakhte the hai tark-e-ta'alluq ghurbat mein

jab dil mein biThate the wo hamein ab dil se utara karte hain

ek daur wo tha sab mil-jul kar dukh-dard baTaya karte the

ek daur ye hai hum aapas mein parKHash gawara karte hain

din-raat taDapta rahta hun hai meri KHabar un ko 'bartar'

karne ko wo parda karte hain chhup-chhup ke nazara karte hain