hunar jo talib-e-zar ho hunar nahin rahta

hunar jo tālib-e-zar ho hunar nahīñ rahtā

mahal-sarā meñ koī kūza-gar nahīñ rahtā

bichhaḌte vaqt kisī se hameñ bhī thā ye gumāñ

ki zaḳhm kaisā bhī ho umr-bhar nahīñ rahtā

maiñ apne haq ke sivā māñgtā agar kuchh aur

to mere harf-e-duā meñ asar nahīñ rahtā

kuchh aur bhī guzar-auqāt ke vasīle haiñ

gadā ḳhazīna-e-kashkol par nahīñ rahtā

vo kaun hai jo musāfir ke saath chaltā hai

ḳhayāl-e-yār bhī jab ham-safar nahīñ rahtā

jise banāte sajāte haiñ jis meñ rahte haiñ

savere aañkh khule to vo ghar nahīñ rahtā

khulī fazā na rahe yaad agar parindoñ ko

ġham-e-shikastagī-e-bāl-o-par nahīñ rahtā

ham ek shab meñ ka.ī ḳhvāb dekhte haiñ so ab

vo aa ke ḳhvāb meñ bhī rāt-bhar nahīñ rahtā

'kamāl' log bhī kyā haiñ gumāñ ye rakhte haiñ

jo bas gayā ho kahīñ dar-ba-dar nahīñ rahtā

hunar jo talib-e-zar ho hunar nahin rahta

mahal-sara mein koi kuza-gar nahin rahta

bichhaDte waqt kisi se hamein bhi tha ye guman

ki zaKHm kaisa bhi ho umr-bhar nahin rahta

main apne haq ke siwa mangta agar kuchh aur

to mere harf-e-dua mein asar nahin rahta

kuchh aur bhi guzar-auqat ke wasile hain

gada KHazina-e-kashkol par nahin rahta

wo kaun hai jo musafir ke sath chalta hai

KHayal-e-yar bhi jab ham-safar nahin rahta

jise banate sajate hain jis mein rahte hain

sawere aankh khule to wo ghar nahin rahta

khuli faza na rahe yaad agar parindon ko

gham-e-shikastagi-e-baal-o-par nahin rahta

hum ek shab mein kai KHwab dekhte hain so ab

wo aa ke KHwab mein bhi raat-bhar nahin rahta

'kamal' log bhi kya hain guman ye rakhte hain

jo bas gaya ho kahin dar-ba-dar nahin rahta