husn-e-aKHlaq-o-mohabbat ki faza chhoD aae

husn-e-aḳhlāq-o-mohabbat kī fazā chhoḌ aa.e

ham jahāñ pahuñche vahāñ bū-e-vafā chhoḌ aa.e

jab chale ghar se to rāziq kā patā chhoḌ aa.e

apne bachchoñ ke liye nām-e-ḳhudā chhoḌ aa.e

ġhair ke saath unheñ hañstā huā chhoḌ aa.e

ḳhair ke saa.e ko ham apnī duā chhoḌ aa.e

vo tamannā.eñ kabhī zinda nahīñ rah saktīñ

un kī mahfil meñ jinheñ rotā huā chhoḌ aa.e

is se pahle ki tirā naam na rusvā ho jaa.e

ḳhuld-āsā tire kūche kī fazā chhoḌ aa.e

apne hāthoñ se tarāshe the kabhī jo ham ne

terī vahdat kī qasam sab vo ḳhudā chhoḌ aa.e

nigah-e-lutf ko ek ek kā muñh takte haiñ

ham ḳhudā jaane kahāñ apnī anā chhoḌ aa.e

'shād' jis raah se haq DhūñDne vaale guzre

ham bhī us raah meñ qadmoñ kī ziyā chhoḌ aa.e

husn-e-aKHlaq-o-mohabbat ki faza chhoD aae

hum jahan pahunche wahan bu-e-wafa chhoD aae

jab chale ghar se to raaziq ka pata chhoD aae

apne bachchon ke liye nam-e-KHuda chhoD aae

ghair ke sath unhen hansta hua chhoD aae

KHair ke sae ko hum apni dua chhoD aae

wo tamannaen kabhi zinda nahin rah saktin

un ki mahfil mein jinhen rota hua chhoD aae

is se pahle ki tera nam na ruswa ho jae

KHuld-asa tere kuche ki faza chhoD aae

apne hathon se tarashe the kabhi jo hum ne

teri wahdat ki qasam sab wo KHuda chhoD aae

nigah-e-lutf ko ek ek ka munh takte hain

hum KHuda jaane kahan apni ana chhoD aae

'shad' jis rah se haq DhunDne wale guzre

hum bhi us rah mein qadmon ki ziya chhoD aae