husn-e-talab ko wasf tumhaara samajh liya

husn-e-talab ko vasf tumhārā samajh liyā

ham ne jhukī nazar kā ishāra samajh liyā

andar se TuuT phuuT bhī hotī chalī ga.ī

ham ne shikast-e-jāñ ko gavārā samajh liyā

mānūs is tarah hue tuġhyāniyoñ se ham

mauj-e-balā ko ham ne kināra samajh liyā

apnoñ se duur ġhair to phir ġhair thā magar

tinke ko Dūbte ne sahārā samajh liyā

aaya shab-e-firāq jo aañsū palak talak

ham ne usī ko sub.h kā taarā samajh liyā

sūd-o-ziyāñ meñ is liye ham ghir ga.e bahut

āsūdgī ko ham ne sahārā samajh liyā

'ādil' ne boltī huī āñkhoñ meñ jhāñk kar

mafhūm iltifāt kā saarā samajh liyā

husn-e-talab ko wasf tumhaara samajh liya

hum ne jhuki nazar ka ishaara samajh liya

andar se TuT phuT bhi hoti chali gai

hum ne shikast-e-jaan ko gawara samajh liya

manus is tarah hue tughyaniyon se hum

mauj-e-bala ko hum ne kinara samajh liya

apnon se dur ghair to phir ghair tha magar

tinke ko Dubte ne sahaara samajh liya

aaya shab-e-firaq jo aansu palak talak

hum ne usi ko subh ka tara samajh liya

sud-o-ziyan mein is liye hum ghir gae bahut

aasudgi ko hum ne sahaara samajh liya

'adil' ne bolti hui aankhon mein jhank kar

mafhum iltifat ka sara samajh liya