hun kam-nigahi se nalan main hashiye ki tarah

huuñ kam-nigāhī se nālāñ maiñ hāshiye kī tarah

nahīñ maiñ TuuT ke bikhrā huuñ hausle kī tarah

ab aise dil kā koī qadr-dāñ bhī kyā hogā

hazār TukḌoñ meñ bikhrā jo aa.ine kī tarah

tumhārī yaad kā saaya thā yā ki thā tūfāñ

udaas kar gayā sunsān rāste kī tarah

miTe miTe sahī kuchh naqsh chhoḌ jā.ūñgā

talāsh hogī mirī gum-shuda pate kī tarah

ye bevafā.ī bhī sahrā nahīñ to phir kyā hai

simaTtī hī nahīñ be-rabt fāsle kī tarah

kyoñ jugnū aañkh ke kone meñ aa ga.e haiñ abhī

uchhāltā hai mujhe kaun qahqahe kī tarah

bikhar na jaa.e kahīñ ḳhvāb aañkh khulte hī

sañbhāl kar ise rakhnā hai aa.ine kī tarah

koī to aisī sanad chhoḌ ke maiñ jā.ūñgā

na bhuul paa.eñ mujhe log hādse kī tarah

thakan se chuur huuñ nazreñ haiñ āsmāñ kī tarah

shikast maan nahīñ saktā hausle kī tarah

ye aarzū hai ki hassās dil ko chhū jā.ūñ

mirī bhī qadr ho be-lāg tabsire kī tarah

baras rahā huuñ kyoñ banjar zamīn par 'anvar'

barat rahā hai mujhe kaun tajrabe kī tarah

hun kam-nigahi se nalan main hashiye ki tarah

nahin main TuT ke bikhra hun hausle ki tarah

ab aise dil ka koi qadr-dan bhi kya hoga

hazar TukDon mein bikhra jo aaine ki tarah

tumhaari yaad ka saya tha ya ki tha tufan

udas kar gaya sunsan raste ki tarah

miTe miTe sahi kuchh naqsh chhoD jaunga

talash hogi meri gum-shuda pate ki tarah

ye bewafai bhi sahra nahin to phir kya hai

simaTti hi nahin be-rabt fasle ki tarah

kyon jugnu aankh ke kone mein aa gae hain abhi

uchhaalta hai mujhe kaun qahqahe ki tarah

bikhar na jae kahin KHwab aankh khulte hi

sanbhaal kar ise rakhna hai aaine ki tarah

koi to aisi sanad chhoD ke main jaunga

na bhul paen mujhe log hadse ki tarah

thakan se chur hun nazren hain aasman ki tarah

shikast man nahin sakta hausle ki tarah

ye aarzu hai ki hassas dil ko chhu jaun

meri bhi qadr ho be-lag tabsire ki tarah

baras raha hun kyon banjar zamin par 'anwar'

barat raha hai mujhe kaun tajrabe ki tarah