ek mehrban ka sab se baDa Dar bhi main hi tha

ik mehrbāñ kā sab se baḌā Dar bhī maiñ hī thā

aur apnī āstīn ke andar bhī maiñ hī thā

vo maiñ thā jo butoñ kā muḳhālif banā rahā

jis ne unheñ tarāshā vo aazar bhī maiñ hī thā

ye Thiik hai ki mujh pe qayāmat uThā.ī ga.ī

lekin janāb hāsil-e-mahshar bhī maiñ hī thā

mahtāb kī jabīn pe bose bhī mere the

miTTī kā Dher ban ke zamīñ par bhī maiñ hī thā

ik sūkhtī nadī kī duhā.ī thī merī aañkh

us aañkh meñ biphartā samundar bhī maiñ hī thā

maiñ apne pāniyoñ pe koī bulbula-sifat

lauh-e-jahāñ pe harf-e-mukarrar bhī maiñ hī thā

mujh pe hī bāda-mastī kī tohmat lagī thī aur

ḳhum-ḳhāna-e-alast kā sāgar bhī maiñ hī thā

sab-rangī-e-nashāt kā aalam merā vajūd

yak-rangī-e-hayāt kā mehvar bhī maiñ hī thā

ek mehrban ka sab se baDa Dar bhi main hi tha

aur apni aastin ke andar bhi main hi tha

wo main tha jo buton ka muKHalif bana raha

jis ne unhen tarasha wo aazar bhi main hi tha

ye Thik hai ki mujh pe qayamat uThai gai

lekin janab hasil-e-mahshar bhi main hi tha

mahtab ki jabin pe bose bhi mere the

miTTi ka Dher ban ke zamin par bhi main hi tha

ek sukhti nadi ki duhai thi meri aankh

us aankh mein bipharta samundar bhi main hi tha

main apne paniyon pe koi bulbula-sifat

lauh-e-jahan pe harf-e-mukarrar bhi main hi tha

mujh pe hi baada-masti ki tohmat lagi thi aur

KHum-KHana-e-alast ka sagar bhi main hi tha

sab-rangi-e-nashat ka aalam mera wajud

yak-rangi-e-hayat ka mehwar bhi main hi tha