insan ke liye is duniya mein dushnam se bachna mushkil hai

insān ke liye is duniyā meñ dushnām se bachnā mushkil hai

taqsīr se bachnā mumkin hai ilzām se bachnā mushkil hai

taa.ir ke liye dushvār nahīñ sayyād-o-qafas se duur rahe

lekin jo shakl-e-nasheman hai us daam se bachnā mushkil hai

dāman ko bachā bhī leñ shāyad sahrā ke nukīle kāñToñ se

gulshan ke magar gul-hā-e-sharar-andām se bachnā mushkil hai

is hādisa-gāh-e-hastī meñ Takrā.eñge do dil kuchh bhī karo

pariyoñ ke liye vo laakh uḌeñ gulfām se bachnā mushkil hai

auhām kī tārīkī to miTā sakte haiñ jalā kar sham.a-e-ḳhirad

lekin ḳhud aql ke zā.ida auhām se bachnā mushkil hai

ai arz-e-sahar ke rāh-ravo manzil pe pahuñchne se pahle

har qāfila jis ne luuT liyā us shaam se bachnā mushkil hai

kuchh qatra-e-mai uupar uupar phir dard hī dard andar andar

āġhāz-e-mohabbat ḳhuub magar anjām se bachnā mushkil hai

ik ḳhuuñ aur gosht ke insāñ kā ma.abūd tirī jannat kī qasam

hūroñ se churānā aañkh āsāñ asnām se bachnā mushkil hai

insān kī hai aulād agar vo 'mullā' ho yā aur koī

hañgām-e-javānī falsafa-e-'ḳhayām' se bachnā mushkil hai

insan ke liye is duniya mein dushnam se bachna mushkil hai

taqsir se bachna mumkin hai ilzam se bachna mushkil hai

tair ke liye dushwar nahin sayyaad-o-qafas se dur rahe

lekin jo shakl-e-nasheman hai us dam se bachna mushkil hai

daman ko bacha bhi len shayad sahra ke nukile kanTon se

gulshan ke magar gul-ha-e-sharar-andam se bachna mushkil hai

is hadisa-gah-e-hasti mein Takraenge do dil kuchh bhi karo

pariyon ke liye wo lakh uDen gulfam se bachna mushkil hai

auham ki tariki to miTa sakte hain jala kar shama-e-KHirad

lekin KHud aql ke zaida auham se bachna mushkil hai

ai arz-e-sahar ke rah-rawo manzil pe pahunchne se pahle

har qafila jis ne luT liya us sham se bachna mushkil hai

kuchh qatra-e-mai upar upar phir dard hi dard andar andar

aaghaz-e-mohabbat KHub magar anjam se bachna mushkil hai

ek KHun aur gosht ke insan ka mabud teri jannat ki qasam

huron se churana aankh aasan asnam se bachna mushkil hai

insan ki hai aulad agar wo 'mulla' ho ya aur koi

hangam-e-jawani falsafa-e-'KHayam' se bachna mushkil hai