is aalam-e-pur-dard mein dukh sab ka KHuda hai

is ālam-e-pur-dard meñ dukh sab kā ḳhudā hai

dil bārgah-e-dukh meñ aqīdat se khaḌā hai

ai shām-nashīñ raat kī tahvīl meñ aa jā

ik ḳhvāb tirī rāhguzar dekh rahā hai

dānista kabhī chhū ke vo lazzat nahīñ paa.ī

jo lutf kisī lams ke dhoke se milā hai

sāvan ke pujārī se kaho kyā hī karegā

is baar to āñkhoñ meñ ġhazab kaal paḌā hai

vo koī qayāmat nahīñ bas āfat-e-jāñ thā

bekār tire shahr meñ ik hashr bapā hai

sab haar diye jaane kā ġham chhoḌ yudhishThir

mādhav kī taraf se ye shubhārambh huā hai

is aalam-e-pur-dard mein dukh sab ka KHuda hai

dil bargah-e-dukh mein aqidat se khaDa hai

ai sham-nashin raat ki tahwil mein aa ja

ek KHwab teri rahguzar dekh raha hai

danista kabhi chhu ke wo lazzat nahin pai

jo lutf kisi lams ke dhoke se mila hai

sawan ke pujari se kaho kya hi karega

is bar to aankhon mein ghazab kal paDa hai

wo koi qayamat nahin bas aafat-e-jaan tha

bekar tere shahr mein ek hashr bapa hai

sab haar diye jaane ka gham chhoD yudhishThir

madhaw ki taraf se ye shubhaarambh hua hai