is Thahraw se pahle bataen kaise rahte the

is Thahrāv se pahle batā.eñ kaise rahte the

ham dariyā the apnī mauj meñ bahte rahte the

us ke ġhalat ravayye par chup rahnā paḌtā thā

laḌ sakte the us se magar ham sahte rahte the

us ne dhoka de ke batāyā duniyā kaisī hai

varna ham kyā ḳhaak samajhte jaise rahte the

us bastī meñ ek ġhazab kā mela lagtā thā

vo aatī rahtī thī ham bhī aate rahte the

in āñkhoñ meñ ḳhvāboñ vaale jugnū raushan the

in chehroñ pe aksar phuul baraste rahte the

dil-āzārī karnā apnā kaam thā duniyā meñ

jo kuchh bhī jī meñ aa jaatā kahte rahte the

is Thahraw se pahle bataen kaise rahte the

hum dariya the apni mauj mein bahte rahte the

us ke ghalat rawayye par chup rahna paDta tha

laD sakte the us se magar hum sahte rahte the

us ne dhoka de ke bataya duniya kaisi hai

warna hum kya KHak samajhte jaise rahte the

us basti mein ek ghazab ka mela lagta tha

wo aati rahti thi hum bhi aate rahte the

in aankhon mein KHwabon wale jugnu raushan the

in chehron pe aksar phul baraste rahte the

dil-azari karna apna kaam tha duniya mein

jo kuchh bhi ji mein aa jata kahte rahte the