ishq ka lafzon se izhaar nahin ho sakta

'ishq kā lafzoñ se iz.hār nahīñ ho saktā

dil kā saudā sar-e-bāzār nahīñ ho saktā

mulk kī shaan meñ sar apnā jhukātā hai jo

merā dā'vā hai vo ġhaddār nahīñ ho saktā

'ishq ke zaḳhm se mahsūs huā hai mujh ko

ek hī tiir kā ye vaar nahīñ ho saktā

aaj insān jo lafzoñ meñ ugal detā hai

saañp us zahr kā haqdār nahīñ ho saktā

bādshāhoñ kā koī jhuuT jo zāhir kar de

is zamāne kā vo aḳhbār nahīñ ho saktā

maañg le jaan bhī ulfat meñ to maiñ de dūñgā

is se baḌh kar maiñ vafādār nahīñ ho saktā

jāntā kaun hai chehre se haqīqat āḳhir

bhiiḌ kahtī hai gunahgār nahīñ ho saktā

ye yaqīñ hai ki karishma to kabhī hogā hī

manziloñ par koī har baar nahīñ ho saktā

jism jo dafn hai maqtūl kā is malbe meñ

faisla kaise mire yaar nahīñ ho saktā

'ishq ka lafzon se izhaar nahin ho sakta

dil ka sauda sar-e-bazar nahin ho sakta

mulk ki shan mein sar apna jhukata hai jo

mera da'wa hai wo ghaddar nahin ho sakta

'ishq ke zaKHm se mahsus hua hai mujh ko

ek hi tir ka ye war nahin ho sakta

aaj insan jo lafzon mein ugal deta hai

sanp us zahr ka haqdar nahin ho sakta

baadshahon ka koi jhuT jo zahir kar de

is zamane ka wo aKHbar nahin ho sakta

mang le jaan bhi ulfat mein to main de dunga

is se baDh kar main wafadar nahin ho sakta

jaanta kaun hai chehre se haqiqat aaKHir

bhiD kahti hai gunahgar nahin ho sakta

ye yaqin hai ki karishma to kabhi hoga hi

manzilon par koi har bar nahin ho sakta

jism jo dafn hai maqtul ka is malbe mein

faisla kaise mere yar nahin ho sakta