itna hasin bhi chahaton ka silsila na ho

itnā hasīñ bhī chāhatoñ kā silsila na ho

ulfat ho tujh se aur tujhī se gila na ho

har dam usī ko sochnā har dam usī kī yaad

nashsha mohabbatoñ kā ho itnā nasha na ho

merī du'ā hai 'ishq meñ chāhe jo haal ho

lekin kisī kā haal mire haal sā na ho

dil jis ko chāhtā hai vo miltā nahīñ use

miltā hai dil ko vo ye jise chāhtā na ho

tū mujh se baat karne ko tarse tamām 'umr

lekin kabhī bhī mujh se tirā rābta na ho

ab mujh meñ ġham uThāne kī tāqat nahīñ rahī

ab zindagī meñ koī nayā hādisa na ho

phaT jaa.e āsmāñ yā zamīñ raakh ho magar

apnā kisī kā koī kisī se judā na ho

ye bhī 'ajīb ‘ālam-e-bechārgī hai dost

manzil to sāmne ho magar rāsta na ho

jaane lage jo aah mirī 'arsh kī taraf

karnā du'ā vo aah mirī bad-du'ā na ho

mere tasavvurāt meñ ḳhvāb-o-ḳhayāl meñ

vo ho na ho magar koī us ke sivā na ho

phir yuuñ na ho ki baa'd meñ pachhtā.eñ 'umr-bhar

in bad-gumāniyoñ meñ koī faisla na ho

dil meñ to us ko apne basānā 'sahar' magar

mahbūb hī rahe vo tumhārā ḳhudā na ho

itna hasin bhi chahaton ka silsila na ho

ulfat ho tujh se aur tujhi se gila na ho

har dam usi ko sochna har dam usi ki yaad

nashsha mohabbaton ka ho itna nasha na ho

meri du'a hai 'ishq mein chahe jo haal ho

lekin kisi ka haal mere haal sa na ho

dil jis ko chahta hai wo milta nahin use

milta hai dil ko wo ye jise chahta na ho

tu mujh se baat karne ko tarse tamam 'umr

lekin kabhi bhi mujh se tera rabta na ho

ab mujh mein gham uThane ki taqat nahin rahi

ab zindagi mein koi naya hadisa na ho

phaT jae aasman ya zamin rakh ho magar

apna kisi ka koi kisi se juda na ho

ye bhi 'ajib ‘alam-e-bechaargi hai dost

manzil to samne ho magar rasta na ho

jaane lage jo aah meri 'arsh ki taraf

karna du'a wo aah meri bad-du'a na ho

mere tasawwuraat mein KHwab-o-KHayal mein

wo ho na ho magar koi us ke siwa na ho

phir yun na ho ki ba'd mein pachhtaen 'umr-bhar

in bad-gumaniyon mein koi faisla na ho

dil mein to us ko apne basana 'sahar' magar

mahbub hi rahe wo tumhaara KHuda na ho