jab samaat hi na ho uski to hai bekar sharh

jab samā.at hī na ho us kī to hai bekār sharh

kyā karūñ dilbar maiñ tujh se apnā hāl-e-zār sharh

dam-ba-ḳhud huuñ kuchh nahīñ kahtā huuñ ro.ab-e-husn se

chup khaḌā huuñ haal apnā karte haiñ aġhyār sharh

dil meñ hai us rashk-e-yūsuf kī ḳharīdārī kā shauq

mere rāz-e-ishq kī ab hai sar-e-bāzār sharh

nosh-e-dārū-e-shifā samjhe jo marg-e-ishq ko

kyā masīhā se kare dard apnā vo bīmār sharh

vasf chashm-e-yār kā sun kar marīz-e-ishq ne

kyuuñ kiyā thā maiñ ne pesh-e-nargis-e-bīmār sharh

māh-e-kan.āñ shefta us par ho bhar kar āh-e-sard

husn-e-jānāñ kī karūñ jo garmī-e-bāzār sharh

kyā zabāñ se vo kahe kyā ho davā kā ḳhvāst-gār

dard-e-dil kartī hai tujh se jis kī shakl-e-zār sharh

nā-tavānī se mujhe yārā-e-goyā.ī nahīñ

haal soz-e-dil karegī āh-e-ātish-bār sharh

ġhair mumkin hai tirā aġhyār se ijrā-e-kār

hājat-e-dil 'barq' kar chal kar tū pesh-e-yār sharh

jab samaat hi na ho us ki to hai bekar sharh

kya karun dilbar main tujh se apna haal-e-zar sharh

dam-ba-KHud hun kuchh nahin kahta hun roab-e-husn se

chup khaDa hun haal apna karte hain aghyar sharh

dil mein hai us rashk-e-yusuf ki KHaridari ka shauq

mere raaz-e-ishq ki ab hai sar-e-bazar sharh

nosh-e-daru-e-shifa samjhe jo marg-e-ishq ko

kya masiha se kare dard apna wo bimar sharh

wasf chashm-e-yar ka sun kar mariz-e-ishq ne

kyun kiya tha main ne pesh-e-nargis-e-bimar sharh

mah-e-kanan shefta us par ho bhar kar aah-e-sard

husn-e-jaanan ki karun jo garmi-e-bazar sharh

kya zaban se wo kahe kya ho dawa ka KHwast-gar

dard-e-dil karti hai tujh se jis ki shakl-e-zar sharh

na-tawani se mujhe yara-e-goyai nahin

haal soz-e-dil karegi aah-e-atish-bar sharh

ghair mumkin hai tera aghyar se ijra-e-kar

hajat-e-dil 'barq' kar chal kar tu pesh-e-yar sharh