jaise dekha hai dikhaya bhi nahin ja sakta

jaise dekhā hai dikhāyā bhī nahīñ jā saktā

ḳhvāb kā haal sunāyā bhī nahīñ jā saktā

pheñkī jaatī bhī nahīñ raah meñ yādeñ us kī

aur ye bojh uThāyā bhī nahīñ jā saktā

aks ko aañkh se thāmā hai sar-e-āb-e-ravāñ

chāñd paanī meñ bahāyā bhī nahīñ jā saktā

do kināre bhī ye hote to milā detā maiñ

dil ko duniyā se milāyā bhī nahīñ jā saktā

hote hote vo mujhe ishq-nagar le hī gayā

maiñ ne sau baar batāyā bhī nahīñ jā saktā

is jagah rah ke maiñ aayā huuñ taḳhayyul vaalo

jis jagah soch kā saayā bhī nahīñ jā saktā

nā-murādī ruḳh-e-qātil pe likhī rahtī hai

ḳhuun kā daaġh miTāyā bhī nahīñ jā saktā

haal ā.inda sunātā chalā jaatā lekin

hañsne vāloñ ko rulāyā bhī nahīñ jā saktā

varna din-rāt maiñ sar-toḌ mashaqqat kartā

kyā karūñ pyaar kamāyā bhī nahīñ jā saktā

ab maiñ kyā raah nikālūñ ki judā.ī jaa.e

us se aayā bhī bulāyā bhī nahīñ jā saktā

dil hī mismār kareñ ahl-e-mohabbat 'nayyar'

puurā māhaul to Dhāyā bhī nahīñ jā saktā

jaise dekha hai dikhaya bhi nahin ja sakta

KHwab ka haal sunaya bhi nahin ja sakta

phenki jati bhi nahin rah mein yaaden us ki

aur ye bojh uThaya bhi nahin ja sakta

aks ko aankh se thama hai sar-e-ab-e-rawan

chand pani mein bahaya bhi nahin ja sakta

do kinare bhi ye hote to mila deta main

dil ko duniya se milaya bhi nahin ja sakta

hote hote wo mujhe ishq-nagar le hi gaya

main ne sau bar bataya bhi nahin ja sakta

is jagah rah ke main aaya hun taKHayyul walo

jis jagah soch ka saya bhi nahin ja sakta

na-muradi ruKH-e-qatil pe likhi rahti hai

KHun ka dagh miTaya bhi nahin ja sakta

haal aainda sunata chala jata lekin

hansne walon ko rulaya bhi nahin ja sakta

warna din-raat main sar-toD mashaqqat karta

kya karun pyar kamaya bhi nahin ja sakta

ab main kya rah nikalun ki judai jae

us se aaya bhi bulaya bhi nahin ja sakta

dil hi mismar karen ahl-e-mohabbat 'nayyar'

pura mahaul to Dhaya bhi nahin ja sakta