jalwe behosh na kar den tere diwanon ko

jalve behosh na kar deñ tire dīvānoñ ko

sham.a kī lau na kahīñ phūñk na de parvānoñ ko

kar na talqīn-e-adab bazm meñ mastānoñ ko

hosh rahtā hai kise dekh ke paimānoñ ko

sub.h kī pahlī kiran shab kā haTātī hai naqāb

zindagī az-sar-e-nau miltī hai armānoñ ko

ziist be-rang thī saada thī kahānī dil kī

rañg baḳhshā tirī ulfat ne hī afsānoñ ko

ye tabassum ye takallum ye tarannum ye adā

be-qarār aur bhī karte haiñ pareshānoñ ko

chand kāñTe rah-e-duniyā se haTā.e haiñ zarūr

gulsitāñ garche banāyā na bayābānoñ ko

muddatoñ kī vo mirī tishna-labī hai ki 'habīb'

taktī hai duur se ḳhāmosh jo paimānoñ ko

jalwe behosh na kar den tere diwanon ko

shama ki lau na kahin phunk na de parwanon ko

kar na talqin-e-adab bazm mein mastanon ko

hosh rahta hai kise dekh ke paimanon ko

subh ki pahli kiran shab ka haTati hai naqab

zindagi az-sar-e-nau milti hai armanon ko

zist be-rang thi sada thi kahani dil ki

rang baKHsha teri ulfat ne hi afsanon ko

ye tabassum ye takallum ye tarannum ye ada

be-qarar aur bhi karte hain pareshanon ko

chand kanTe rah-e-duniya se haTae hain zarur

gulsitan garche banaya na bayabanon ko

muddaton ki wo meri tishna-labi hai ki 'habib'

takti hai dur se KHamosh jo paimanon ko