jalwe ka un ke ye hai asar kuchh KHabar nahin

jalve kā un ke ye hai asar kuchh ḳhabar nahīñ

maiñ kaun huuñ kahāñ huuñ kidhar kuchh ḳhabar nahīñ

siine meñ har taraf nazar aatā hai dard hī

dil hai kahāñ kahāñ hai jigar kuchh ḳhabar nahīñ

āñkhoñ meñ ek rang udāsī kā jam gayā

kaisī hai shaam kaisī sahar kuchh ḳhabar nahīñ

ab chārāgar tū mujh se mirā haal kuchh na pūchh

hai yā nahīñ hai dard-e-jigar kuchh ḳhabar nahīñ

har dam tire ḳhayāl meñ hai mahviyat mujhe

hotī hai kaise umr basar kuchh ḳhabar nahīñ

itnā to jānte haiñ ki dil meñ haiñ zalzale

kyā kar ga.ī ik un kī nazar kuchh ḳhabar nahīñ

rahtā hai bandishoñ meñ vo har vaqt ziist kī

apnī qazā kī rakhtā bashar kuchh ḳhabar nahīñ

ab itnī mahviyat hai hameñ tere ishq meñ

kaisī ḳhabar kahāñ kī ḳhabar kuchh ḳhabar nahīñ

laa.ī hai apne saath jo 'nashtar' shab-e-firāq

is shaam kī kab hogī sahar kuchh ḳhabar nahīñ

jalwe ka un ke ye hai asar kuchh KHabar nahin

main kaun hun kahan hun kidhar kuchh KHabar nahin

sine mein har taraf nazar aata hai dard hi

dil hai kahan kahan hai jigar kuchh KHabar nahin

aankhon mein ek rang udasi ka jam gaya

kaisi hai sham kaisi sahar kuchh KHabar nahin

ab chaaragar tu mujh se mera haal kuchh na puchh

hai ya nahin hai dard-e-jigar kuchh KHabar nahin

har dam tere KHayal mein hai mahwiyat mujhe

hoti hai kaise umr basar kuchh KHabar nahin

itna to jaante hain ki dil mein hain zalzale

kya kar gai ek un ki nazar kuchh KHabar nahin

rahta hai bandishon mein wo har waqt zist ki

apni qaza ki rakhta bashar kuchh KHabar nahin

ab itni mahwiyat hai hamein tere ishq mein

kaisi KHabar kahan ki KHabar kuchh KHabar nahin

lai hai apne sath jo 'nashtar' shab-e-firaq

is sham ki kab hogi sahar kuchh KHabar nahin