jawon se ayan teri haqiqat nahin hoti

javoñ se ayaañ terī haqīqat nahīñ hotī

ā.īne meñ ā.īne kī sūrat nahīñ hotī

kyā shaad rahe dahr meñ bāshinda adam kā

pardes meñ jī lagne kī sūrat nahīñ hotī

murjhā.e hue dil pe jamīñ kis kī nigāheñ

kumhlā.e hue phuul kī qīmat nahīñ hotī

pābandī-e-ā.īn se majbūr haiñ varna

darbāñ ko asīroñ se adāvat nahīñ hotī

maiñ qaid meñ huuñ aur tasavvur mirā bāhar

majbūr kī majbūr tabī.at nahīñ hotī

sab kahte haiñ ā.īna-sifat hai ye dil apnā

aur aa.ine meñ gard-e-kudūrat nahīñ hotī

jawon se ayan teri haqiqat nahin hoti

aaine mein aaine ki surat nahin hoti

kya shad rahe dahr mein bashinda adam ka

pardes mein ji lagne ki surat nahin hoti

murjhae hue dil pe jamin kis ki nigahen

kumhlae hue phul ki qimat nahin hoti

pabandi-e-ain se majbur hain warna

darban ko asiron se adawat nahin hoti

main qaid mein hun aur tasawwur mera bahar

majbur ki majbur tabiat nahin hoti

sab kahte hain aaina-sifat hai ye dil apna

aur aaine mein gard-e-kudurat nahin hoti