jite ji KHud se mohabbat mein guzarna hai mujhe

jiite jī ḳhud se mohabbat meñ guzarnā hai mujhe

sūrat-e-mauj-e-ravāñ miT ke ubharnā hai mujhe

yaad meñ un kī maiñ ḳhūñ-nāba-fashāñ kyoñ na rahūñ

rang ab ishq kī tasvīr meñ bharnā hai mujhe

ḳhizr haiñ vo ki thī jin ko havas-e-āb-e-hayāt

behtar-az-zīst tire ishq meñ marnā hai mujhe

har shab is hiile se aatī hai chaman meñ shabnam

motiyoñ se muñh har ik phuul kā bharnā hai mujhe

vāda-e-dīd uThā rakhte ho kyoñ mahshar par

saaf ye kyoñ nahīñ kahte ki sañvarnā hai mujhe

saañs ko chalte hue dekh ke maiñ jaan gayā

jāma-e-umr isī qaiñchī se katarnā hai mujhe

zauq-āgīñ maiñ ġhazal kyoñ na sunā.ūñ 'zā.iq'

naam hai jaisā mirā kaam bhī karnā hai mujhe

jite ji KHud se mohabbat mein guzarna hai mujhe

surat-e-mauj-e-rawan miT ke ubharna hai mujhe

yaad mein un ki main KHun-naba-fashan kyon na rahun

rang ab ishq ki taswir mein bharna hai mujhe

KHizr hain wo ki thi jin ko hawas-e-ab-e-hayat

behtar-az-zist tere ishq mein marna hai mujhe

har shab is hile se aati hai chaman mein shabnam

motiyon se munh har ek phul ka bharna hai mujhe

wada-e-did uTha rakhte ho kyon mahshar par

saf ye kyon nahin kahte ki sanwarna hai mujhe

sans ko chalte hue dekh ke main jaan gaya

jama-e-umr isi qainchi se katarna hai mujhe

zauq-agin main ghazal kyon na sunaun 'zaiq'

nam hai jaisa mera kaam bhi karna hai mujhe