jis ghaDi rah-e-pur-Khaar maine chuni sath usne bhi azm-e-safar kar liya

jis ghaḌī rāh-e-pur-ḳhār maiñ ne chunī saath us ne bhī azm-e-safar kar liyā

sub.h sūraj nikalne se pahle chale, jis jagah ho ga.ī raat ghar kar liyā

dam-ba-dam ek dīvār uThtī ga.ī ik chhurī merā siina khurachtī ga.ī

jaise jaise ghuTan shahr kī baḌh chalī maiñ ne dil meñ nayā ek dar kar liyā

ik sadā mere kānoñ meñ aatī rahī ik balā naam le kar bulātī rahī

muḌ ke dekhā na maiñ ne kabhī raah meñ jo safar tai kiyā be-ḳhatar kar liyā

zindagī apnī guzrī hai dukh bāñTte, baaḌh kāñToñ kī har har qadam chhāñTte

hijr kī fasl palkoñ tale kāTte jo bhī koh-e-girāñ thā vo sar kar liyā

un ke aane kī phailī ḳhabar chār-sū aa.ine mah jabīnoñ ke haiñ rū-ba-rū

maiñ ne bhī un ke chehre pe Daalī nazar raushnī ko asīr-e-nazar kar liyā

log aate haiñ merā pata pūchhte mere sheroñ ko paḌh kar tujhe DhūñDte

tujh pe mere suḳhan kā na jaadū chalā maiñ ne duniyā duniyā ko asar kar liyā

hāsidoñ ke maiñ tā'noñ kā suntā rahā, reza reza vajūd apnā chintā rahā

bārish-e-sañg meñ bhī na pīchhe haTā, maiñ ne us dil ko patthar kā ghar kar liyā

gum-shuda rāstoñ kā pata haath meñ, biitī yādoñ kā basta liye saath meñ

maiñ ne sahrā ko apnā ta'āruf kiyā aur qalam apnā dast-e-hunar kar liyā

maiñ ne ḳhud ko mahloñ meñ bāñTā nahīñ, maiñ ne ḳhānoñ meñ logoñ ko chhāñTā nahīñ

mujh ko dād-e-suḳhan se ġharaz ab nahīñ maiñ ne harf-e-suḳhan mo'atabar kar liyā

'umr baḌhtī ga.ī juuñ juuñ māñ-bāp kii, āmad-o-raft mahdūd hotī ga.ī

baiThe baiThe dar-o-bām takte rahe bolnā-chālnā muḳhtasar kar liyā

dhīre dhīre chaTTāneñ pighaltī rahīñ qatra qatra samundar nigaltī rahīñ

vo jo aañsū na Dhalkā kabhī gaal par, us ko dil ke sadaf ne guhar kar liyā

baap kī DaañT bhī mujh ko aisī milī jaise maañ kī mohabbat kī misrī Dalī

qufl dil kī tijorī ko maiñ ne kiyā aur mahfūz ye māl-o-zar kar liyā

mausamoñ ke ġhazab se bachāte hue, apnī bāhoñ kā halqa banāte hue

dukh uThā.e jahāñ merī maañ ne bahut, apne āñgan kā paudā shajar kar liyā

maiñ ne bachpan guzārā hai apnā yahāñ us ke saa.e meñ pal kar huā maiñ javāñ

kaise bhūlūñ maiñ 'ḳhusrav' ye kachchā makāñ, us makāñ ne mire dil meñ ghar kar liyā

jis ghaDi rah-e-pur-KHar main ne chuni sath us ne bhi azm-e-safar kar liya

subh suraj nikalne se pahle chale, jis jagah ho gai raat ghar kar liya

dam-ba-dam ek diwar uThti gai ek chhuri mera sina khurachti gai

jaise jaise ghuTan shahr ki baDh chali main ne dil mein naya ek dar kar liya

ek sada mere kanon mein aati rahi ek bala nam le kar bulati rahi

muD ke dekha na main ne kabhi rah mein jo safar tai kiya be-KHatar kar liya

zindagi apni guzri hai dukh banTte, baDh kanTon ki har har qadam chhanTte

hijr ki fasl palkon tale kaTte jo bhi koh-e-giran tha wo sar kar liya

un ke aane ki phaili KHabar chaar-su aaine mah jabinon ke hain ru-ba-ru

main ne bhi un ke chehre pe Dali nazar raushni ko asir-e-nazar kar liya

log aate hain mera pata puchhte mere sheron ko paDh kar tujhe DhunDte

tujh pe mere suKHan ka na jadu chala main ne duniya duniya ko asar kar liya

hasidon ke main ta'non ka sunta raha, reza reza wajud apna chinta raha

barish-e-sang mein bhi na pichhe haTa, main ne us dil ko patthar ka ghar kar liya

gum-shuda raston ka pata hath mein, biti yaadon ka basta liye sath mein

main ne sahra ko apna ta'aruf kiya aur qalam apna dast-e-hunar kar liya

main ne KHud ko mahlon mein banTa nahin, main ne KHanon mein logon ko chhanTa nahin

mujh ko dad-e-suKHan se gharaz ab nahin main ne harf-e-suKHan mo'atabar kar liya

'umr baDhti gai jun jun man-bap ki, aamad-o-raft mahdud hoti gai

baiThe baiThe dar-o-baam takte rahe bolna-chaalna muKHtasar kar liya

dhire dhire chaTTanen pighalti rahin qatra qatra samundar nigalti rahin

wo jo aansu na Dhalka kabhi gal par, us ko dil ke sadaf ne guhar kar liya

bap ki DanT bhi mujh ko aisi mili jaise man ki mohabbat ki misri Dali

qufl dil ki tijori ko main ne kiya aur mahfuz ye mal-o-zar kar liya

mausamon ke ghazab se bachate hue, apni bahon ka halqa banate hue

dukh uThae jahan meri man ne bahut, apne aangan ka pauda shajar kar liya

main ne bachpan guzara hai apna yahan us ke sae mein pal kar hua main jawan

kaise bhulun main 'KHusraw' ye kachcha makan, us makan ne mere dil mein ghar kar liya