jo har dam zehn mein chubhti hai wo silwaT nahin jati

jo har dam zehn meñ chubhtī hai vo silvaT nahīñ jaatī

ki bistar par bhī mere dil kī ghabrāhaT nahīñ jaatī

maiñ apnī zindagī se barsar-e-paikār huuñ phir bhī

anā ke sahn se ehsās kī aahaT nahīñ jaatī

sar-e-maġhrūr ko chaukhaT kī 'azmat khīñch letī hai

kisī kā sar jhukāne ke liye chaukhaT nahīñ jaatī

maiñ rakkhūñ laakh mīThe bol chun kar apne hoñToñ par

magar lahje se sachchā.ī kī kaḌvāhaT nahīñ jaatī

batā detī hai hāl-e-dil nigāh-e-muztarib un kī

pareshāñ ho ke 'āriz kī taraf ab laT nahīñ jaatī

samajhtā huuñ ki vo ik baar aa kar phir nahīñ aa.e

magar qadmoñ kī un ke aaj tak aahaT nahīñ jaatī

jalā.eñge diloñ ko tā-ba-kai sho'le mazālim ke

fazā kyoñ garm aahoñ ke dhueñ se aT nahīñ jaatī

agar phūloñ kī sejoñ par vo mahv-e-ḳhvāb rahte haiñ

to kyā kāñToñ ke bistar par mirī shab kaT nahīñ jaatī

'atīq' achchhā nahīñ hotā ġhurūr apne baḌe-pan kā

buzurgoñ ke qadam chhūne se 'azmat ghaT nahīñ jaatī

jo har dam zehn mein chubhti hai wo silwaT nahin jati

ki bistar par bhi mere dil ki ghabrahaT nahin jati

main apni zindagi se barsar-e-paikar hun phir bhi

ana ke sahn se ehsas ki aahaT nahin jati

sar-e-maghrur ko chaukhaT ki 'azmat khinch leti hai

kisi ka sar jhukane ke liye chaukhaT nahin jati

main rakkhun lakh miThe bol chun kar apne honTon par

magar lahje se sachchai ki kaDwahaT nahin jati

bata deti hai haal-e-dil nigah-e-muztarib un ki

pareshan ho ke 'ariz ki taraf ab laT nahin jati

samajhta hun ki wo ek bar aa kar phir nahin aae

magar qadmon ki un ke aaj tak aahaT nahin jati

jalaenge dilon ko ta-ba-kai sho'le mazalim ke

faza kyon garm aahon ke dhuen se aT nahin jati

agar phulon ki sejon par wo mahw-e-KHwab rahte hain

to kya kanTon ke bistar par meri shab kaT nahin jati

'atiq' achchha nahin hota ghurur apne baDe-pan ka

buzurgon ke qadam chhune se 'azmat ghaT nahin jati