jo karta rahta hun ab jhagDe apne aap se main

jo kartā rahtā huuñ ab jhagḌe apne aap se maiñ

banā rahā huuñ na.e rishte apne aap se maiñ

maiñ tere hijr se pahle bhī ek hijr meñ thā

tū bichhḌā baa'd meñ aur pahle apne aap se maiñ

batā rahā hai mire pīchhe uḌne vaalā ġhubār

nikal gayā huuñ kahīñ aage apne aap se maiñ

tumhāre saath to har haal meñ vafā kī hai

agarche kartā rahā dhoke apne aap se maiñ

maiñ apne aap se kartā huuñ mā'zarat pahle

nahīñ karūñgā koī vā'de apne aap se maiñ

mirā vujūd achānak alag huā mujh se

kahīñ pe jaane lagā jaise apne aap se maiñ

maiñ itnā bhāgā ki manzil bhī rah ga.ī pīchhe

'zahūr' kaTtā gayā aise apne aap se meñ

jo karta rahta hun ab jhagDe apne aap se main

bana raha hun nae rishte apne aap se main

main tere hijr se pahle bhi ek hijr mein tha

tu bichhDa ba'd mein aur pahle apne aap se main

bata raha hai mere pichhe uDne wala ghubar

nikal gaya hun kahin aage apne aap se main

tumhaare sath to har haal mein wafa ki hai

agarche karta raha dhoke apne aap se main

main apne aap se karta hun ma'zarat pahle

nahin karunga koi wa'de apne aap se main

mera wujud achanak alag hua mujh se

kahin pe jaane laga jaise apne aap se main

main itna bhaga ki manzil bhi rah gai pichhe

'zahur' kaTta gaya aise apne aap se mein