jo kuchh dekha aur samjha hai nazr-e-lauh-o-qalam karta hun

jo kuchh dekhā aur samjhā hai nazr-e-lauh-o-qalam kartā huuñ

ya.anī chashm-e-hairat par maiñ sachche ḳhvāb raqam kartā huuñ

pahle merī dānā.ī par koī vahshat chhā jaatī hai

aur phir puurī quvvat se maiñ us kī shiddat kam kartā huuñ

zaḳhm-e-malāmat nochte rahnā vaise bhī to be-masraf hai

jitnā ho saktā hai mujh se bas utnā hī ġham kartā huuñ

yuuñ to saare jag se laḌ kar maiñ ne ḳhud ko manvāyā hai

lekin ik goshe meñ apne hone kā mātam kartā huuñ

dil aur duniyā ek jagah par yaksāñ raushan kab hote haiñ

ek charāġh kī lau bhaḌkā kar ek diyā maddham kartā huuñ

varna 'samīr' is sannāTe meñ koī kaise rah saktā hai

jis had tak mumkin ho mujh se āvāzeñ paiham kartā huuñ

jo kuchh dekha aur samjha hai nazr-e-lauh-o-qalam karta hun

yani chashm-e-hairat par main sachche KHwab raqam karta hun

pahle meri danai par koi wahshat chha jati hai

aur phir puri quwwat se main us ki shiddat kam karta hun

zaKHm-e-malamat nochte rahna waise bhi to be-masraf hai

jitna ho sakta hai mujh se bas utna hi gham karta hun

yun to sare jag se laD kar main ne KHud ko manwaya hai

lekin ek goshe mein apne hone ka matam karta hun

dil aur duniya ek jagah par yaksan raushan kab hote hain

ek charagh ki lau bhaDka kar ek diya maddham karta hun

warna 'samir' is sannaTe mein koi kaise rah sakta hai

jis had tak mumkin ho mujh se aawazen paiham karta hun