junun-e-shauq mein mahw-e-tamasha ho gae hum tum

junūn-e-shauq meñ mahv-e-tamāshā ho ga.e ham tum

mohabbat rañg laa.ī ḳhuub rusvā ho ga.e ham tum

koī monis na hamdam hai na koī rāz-dāñ apnā

hujūm-e-shauq ke saa.e meñ tanhā ho ga.e ham tum

añdheroñ meñ bhaTaktī hai javānī raushnī kaisī

ye kyā manzil hai mahrūm-e-tamannā ho ga.e ham tum

parastār-e-vafā koī nahīñ bāzār-e-ulfat meñ

ḳharīdārī nahīñ jis kī vo saudā ho ga.e ham tum

azal se qismat-e-ādam mohabbat se hai vābasta

jahāñ meñ kis liye phir aah rusvā ho ga.e ham tum

chale the do qadam jab bhī kabhī anjām rāhoñ par

hasīn-o-gul-fishāñ rāhoñ pe shaidā ho ga.e ham tum

surūr-o-kaif ke aalam meñ apnī hosh kho baiThe

'nazar' kī choT khā kar mahv-e-jalvā ho ga.e ham tum

junun-e-shauq mein mahw-e-tamasha ho gae hum tum

mohabbat rang lai KHub ruswa ho gae hum tum

koi monis na hamdam hai na koi raaz-dan apna

hujum-e-shauq ke sae mein tanha ho gae hum tum

andheron mein bhaTakti hai jawani raushni kaisi

ye kya manzil hai mahrum-e-tamanna ho gae hum tum

parastar-e-wafa koi nahin bazar-e-ulfat mein

KHaridari nahin jis ki wo sauda ho gae hum tum

azal se qismat-e-adam mohabbat se hai wabasta

jahan mein kis liye phir aah ruswa ho gae hum tum

chale the do qadam jab bhi kabhi anjam rahon par

hasin-o-gul-fishan rahon pe shaida ho gae hum tum

surur-o-kaif ke aalam mein apni hosh kho baiThe

'nazar' ki choT kha kar mahw-e-jalwa ho gae hum tum