karwan walon ne kho di KHud hi apni aabru

kārvāñ vāloñ ne kho dī ḳhud hī apnī aabrū

lailā-e-mahmil-nashīñ ko pā-ba-jaulāñ laa.e haiñ

qais kī ġhairat kā miltā hī nahīñ koī surāġh

kuchh bagūle DhūñD kar sahrā-ba-sahrā aa.e haiñ

Das liyā hai raushnī ne de ke javoñ kā fareb

saañp kitne us ke ujle ruup meñ lahrā.e haiñ

aa.ine TuuTe haiñ kitne dekh kar un kā jamāl

aap apnī ārzū-e-husn par sharmā.e haiñ

kaun jaane ho chuke maslūb kitne ashk-e-ġham

kitnī fariyādoñ ke dil husn-e-talab ne Dhaa.e haiñ

kitnī zanjīroñ ke halqe pāyaloñ meñ Dhal ga.e

shabnamī āñkhoñ meñ raqsāñ bebasī ke saa.e haiñ

'baḳht' shikva kyā kareñ ahl-e-sitam ke jaur kā

ahl-e-dil ne giit marg-e-ābrū par gaa.e haiñ

karwan walon ne kho di KHud hi apni aabru

laila-e-mahmil-nashin ko pa-ba-jaulan lae hain

qais ki ghairat ka milta hi nahin koi suragh

kuchh bagule DhunD kar sahra-ba-sahra aae hain

Das liya hai raushni ne de ke jawon ka fareb

sanp kitne us ke ujle rup mein lahrae hain

aaine TuTe hain kitne dekh kar un ka jamal

aap apni aarzu-e-husn par sharmae hain

kaun jaane ho chuke maslub kitne ashk-e-gham

kitni fariyaadon ke dil husn-e-talab ne Dhae hain

kitni zanjiron ke halqe payalon mein Dhal gae

shabnami aankhon mein raqsan bebasi ke sae hain

'baKHt' shikwa kya karen ahl-e-sitam ke jaur ka

ahl-e-dil ne git marg-e-abru par gae hain