kab is zamin ki samt samundar palaT kar aae

kab is zamīñ kī samt samundar palaT kar aa.e

iz.hār-e-avvalīñ kā vo manzar palaT kar aa.e

jab harf likh diyā hai to kyuuñ mushtahar na ho

niklā kamāñ se tiir to kyūñkar palaT kar aa.e

ho saare shahr meñ ye munādī ki jashn ho

apnī hī saf meñ haare dilāvar palaT kar aa.e

yā be-ḳhabar the vus.at-e-dariyā-e-rang se

yā chashm-e-be-hunar the shanāvar palaT kar aa.e

bāzār pur-hujūm ḳharīdār kam-savād

chup-chāp le ke apne gul-e-tar palaT kar aa.e

itne baḳhīl peḌ na dekhe the aaj tak

be-fasl be-samar mire patthar palaT kar aa.e

asnām kā hujūm kabhī is qadar na thā

in vādiyoñ meñ kaun se aazar palaT kar aa.e

kyā ik khulā fusūñ hai shafaq rañg dopahar

kyā raat ho ga.ī hai ki shahpar palaT kar aa.e

'manzūr' phir zamīñ pe ujālā ho ek baar

kaash ek baar phir vo payambar palaT kar aa.e

kab is zamin ki samt samundar palaT kar aae

izhaar-e-awwalin ka wo manzar palaT kar aae

jab harf likh diya hai to kyun mushtahar na ho

nikla kaman se tir to kyunkar palaT kar aae

ho sare shahr mein ye munadi ki jashn ho

apni hi saf mein haare dilawar palaT kar aae

ya be-KHabar the wusat-e-dariya-e-rang se

ya chashm-e-be-hunar the shanawar palaT kar aae

bazar pur-hujum KHaridar kam-sawad

chup-chap le ke apne gul-e-tar palaT kar aae

itne baKHil peD na dekhe the aaj tak

be-fasl be-samar mere patthar palaT kar aae

asnam ka hujum kabhi is qadar na tha

in wadiyon mein kaun se aazar palaT kar aae

kya ek khula fusun hai shafaq rang dopahar

kya raat ho gai hai ki shahpar palaT kar aae

'manzur' phir zamin pe ujala ho ek bar

kash ek bar phir wo payambar palaT kar aae